ANGAY ba natong saulogon ang pagdeklarar ni Presidenti Marcos sa Martial Law niadtong 1972.

Ang rason ni Marcos pagdeklarar sa Martial Law mao ang paghatag og dalan alang sa gitawag niya nga 'Bagong Lipunan' diin magbasi sa bag-ong panglantaw sa politika ug sosyodad nga magsalikway niining kinaiya sa Filipino sama niining utang na loob nga maoy babag sa kalamposan sa nasod.

Sa milabay nga katuigan sukad gideklarar ang Martial Law duna bay kausaban nga nahitabo sa Pilipinas.

Ubos sa pamunoan ni Marcos nabungkag ang private armies sa mga politko, gipangsikop ang mga criminal, gipangdakop ang mga politiko, aktibista, estudyanti o bisan kinsa nga supak sa iyang administrasyon.

Samtang nagpahimulos sa gahom si Marcos ug iyang mga crony nisiaw pag-ayo ang pangurakot sa gobiyerno.

Daghang tinonto nga nahitabo, mga inhustisya, pagpanglupig, kadaotan, pamintaha ug ubang pang kadaotan niadtong panahona.

Karong adlawa takdo nga 37 ka tuig sukad gipakanaog ang Martial Law. Ang drama nga pagpa-ambush ni Juan Ponce Enrile nga maoy Minister of National Defense kaniadto, maoy nahimong pabilo sa deklarasyon. Karon, si senador Enrile anaa pa sa gahom ug maoy Senate President nato karon.

Nalumpag ang diktatoryang pamunoan ni Marcos pinaagi sa Edsa People Power niadtong 1986 kay gusto na gyud og kausaban ang katawhang Filipino.

Unya mipuli ang bag-ong pamunoan gikan ni Presidenti Aquino, Ramos, Estrada ug hangtod karon, ang pamunoan ni Presidenti Arroyo.

Sunod tuig mao na ang pagpili nato og bag-ong presidenti. Ato daw nga lantawon ang miaging pamunoan, lantawon nato ang kasinatian sa atong nasod gikan sa diktatoryang pamunoan hangtod sa demokratikanhong administrasyon.

Susihon nato kon nawala ba o miminus ang pangurakot, inhustisya, pagpanglupig ug pagpangdaogdaog sa katawhan.

Kon sa imong tan-aw migrabe ang kadaotan karon itandi sa panahon sa Martial Law, nan, depektoso gyud diay ang pamunoan ubos sa demokratikanhong administrasyon.

Ang akong hagit lang dire mao nga kita, ang mabuot nga lungsorahon, mobarog nga maisogon sa atong katungod pagbatok sa mga kalapasan sa tawhanong katungod, kay kon dili, sa ulahi kita ra gihapon ang mag-antos, Martial Law man o demokrasya.

Karong adlaw hinumdoman nato ang kangitngit sa Martial Law pinaagi sa pagdagkot og kandila sa tinuod nga demokrasya sa atong kaugalingon nga maoy sinugdanan sa kausaban.