NASUNOG ang lain-laing parte sa lawas sa usa ka construction worker human nakuryente sulod sa Maxandrea Hotel, Cogon ning siyudad sa Cagayan de Oro.

Giila ang biktima nga mao si Begmond Mulawan, 23, minyo, taga Carmen ning siyudad.

Nahitabo ang insidente Domingo mga alas 7:30 sa buntag atol sa pagtrabaho sa biktima.

Gisaysay sa usa sa personahe sa Northern Mindanao Medical Center (NMMC) diin gidala ang biktima nga usa sa kauban niini ang nahinabi nga nisakay kini og kabilya padulong sa taas nga bahin aron sugdang na ang trabaho apan kalit lang nga naputol ang kabilya hinungdan nga nahulog ang biktima.

Samtang ang kabilya nahulog ngadto sa tranformer nga gipanag-iyahan sa maong hotel hinungdan nga kini nibuto.

Nakuryente ang biktima ug giingong nikirig hinungdan nga ubay-ubay nga paso sa tiil ug sa kamot ang naangkon niini.

Maayo na lang nga igo lang nga mibuto ug deretso nga natumba hinungdan nga natabang kini sa mga kauban.

Gidali pagdala ang biktima sa NMMC kinsa luwas na sa makuyawng kahimtang apan padayon pang giatiman sa doktor ning panahona.

Nasayran nga taud-taud na nga nagtrabaho isip construction worker sa maong hotel si Mulawan.