Ulitawo gipusil sa polis

Wednesday, February 10, 2010

NILANDING sa balay tambalanan ang 18 anyos nga ulitawo human gipusil sa polis kagahapon mga alas 12:30 sa kadalwon, sa Cogon, lungsod sa Balingasag, Misamis Oriental.

Giila ang biktima nga mao si Frances Montajes, sa susamang dapit kinsa gipusil sa usa ka polis nga sakop sa Balingasag Police Station.

Have something to report? Tell us in text, photos or videos.

Gisaysay sa higala sa biktima nga kauban ni Montajes nga gikan sila nag-inom ug sakay na sa motorsiklo aron muoli sa puloy-anan dihang gisunod sa gituohan nga night duty nga wala mailang polis. Gigukod ang mga biktima hinungdan sa pagkatumba sa motorsiklo.

Dihang naligid na si Montajes sa semento giduolan kini sa maong polis ug deretso nga gipusil ang tiyan nga bahin nga nilapos pa sa paa niini.

Nisuway sa pakighinabi ang Sun.Star Superbalita sa kapolisan sa Balingasag apan nidumili sa paghatag sa pamahayag ning panahona.

Gidala sa higala niini si Montejes sa Northern Mindanao Medical Center (NMMC) ning siyudad sa Cagayan nga deretsong gisulod sa operating room.

Ang mga hingtungdan sa biktima gustong mahatagan og hustisya ang nahitabo sa biktima labina nga wala kini dautan nga gihimo gawas sa gabii na nga miuli niadtong tungora. (SVB)