Intawon ang kabarangayan. Kadaghanan halos nanga-ulipon sa mga trapo. Ang trapo mao nang lider nga kinaraan og estilo sa pamolitika, mag-lama-lama lang, ug di hibalo mokonsulta sa tagilungsod.

Serbisyo publiko ang gidaganan, apan sa pagkatinuod serbisyo personal ang giapas. Panginabuhi pangatungdanan.

Busa way pondo mabilin sa barangay pagkahuman sa ilang termino. Hudton gyud sa ilang allowance. Human, kay wa sab hibalo pagpatubo sa capital, dili ipamuhunan ang IRA nga maoy capital sa barangay, dili gyud motubo ang katigayonan sa katilingban. 

Resulta: hangtud karon, moderno na unta ang panahon, pinobre pa gihapon ang pagdumala ning kinaubsan nga kagamhanan. Busa pinobre lang usab ang kalamboan kun duna man ugaling.

"Pinobre" apan dili tungod kay kabus ug walay kwarta; pinobre kay kulang intawon sa hibalo o abilidad paggalam lungsodnong katigayonan.

Ang kapobrehon dili gumikan sa kawad-on sa bulsa, kun dili sa kawad-on sa utok ug panlantaw.

Ang katawhan usab, way pagpakabana. Bisan ang anaa sa kagamhanan, way nasayud sa diwa ug mithi sa demokrasya. Maoy hinungdan nga dili tarong pagkabalay sa gobyerno sa ubos, ug way hingpit nga pagtagad sa mga gimbuhaton.

Mga tinugyanan ug lungsoranaon tabla sa kapobrehon sa utok ug kabangkaagan. Pero ang kwarta atua sa bulsa sa tinugyanan. Sila ra, uban ilang sakop ug agalon nga dagkong trapo, ang magkabulahan.

Ang kadaghanan magmata lang og buntag. Walay kalibutan sa panghitabo bisan og adlaw nga dako gapangawaton ang ilang katigayonan.

Kung magpadayon kini nga kahimtang, diin naghari ang ignoranteng pagdumala samtang magpatara lang ang lungsod, wala gyuy mapaabot nga kauswagan.

(Kanhi opisyal sa United Nations, national convener sa Gising Barangay Movement si Manny.)