Ni Manuel Valdehuesa
Barangaynon

Grabe na kadaghan ang mga lungsoranong magakawad-an og interest sa election. Tungod kini kay matag piliay mao lang gihapon ang modagan. Mga "traditional politician" o trapo. Sumo nga mga dagway. Maayo ra og adunay mga bag-ong idea.

Karon pa lang, wala pa magsugod ang panahon sa pangampanya, napukot na ang kahanginan sa pamulitika. Lain-laing panon sa trapo magyawyaw, magpasi-atab.

Adlaw-adlaw molanog ang mga pasumbingay, pasalig, pasigarbo sa sibyahan. Busa dili katingad-an masumhan gyud ang mabuot nga tawo. Maayo ra og mga malantip og salabutan.

Dugay na kaayo kining mga trapo sa katungdanan. Kun dili ang tigulang, ang anak, asawa o kaubanan. Apan walay kasulbaran sa problema sa katilingban. Ang pobre nagpabiling kabus, ang adunahan mas nasapi-an.

Pero ang mga trapo, nabulahan! Usik-usikan ug buot-buotan pa gayud ang salapi sa lungsod.

Naanad kini sila sa way puwas nga pahimulos og pagbuot-buot. Dili ra ba sayon makaplagan ang hiwi nga pamuhaton. Hanas gud sa panikas, ug sa pamaagi aron dili masakpan, sama sa magikero nga alisto ug igmat mga kamot.

Ang nakalisod kay daghan pud mga tulibagbag nga botante, mga tawong nagtuo nga OK lang panapi-on ang politika. Kini sila ang nakahatag kaisug sa mga trapo sa ilang yawan-ong kalaki ug buhat. Sayon man sila himoong pasumbingay sa pangurakot.

Moingon lang ang trapo nga ang tanan nilang buhat alang sa mga kabus, mopiyong na lang dayon ang mata sa tulibagbag. Manganugon man, kay basig mawala ang unsa mang kaayuhan nakuot sa trapo alang kanila.

Sa pagkatinuod, kung aduna ma'y hinabang gigahin sa trapo alang sa mga pobre, gamay ra kaayo comparer sa ilang gasuyopon ug ibulsa. Sa buwangan pa, balato lang.  

Kinsa ma'y nagduha-duha pagtuo niini, sud-onga lang ang panimalay, galamiton, lain-laing salakyan, ug mga kabtangan sa mga trapo. Grabe pagkasapi-an.

Grabe pud nga labad sa ulo sa katilingban -- ang Haring Lungsod nga gihimo nilang ulipon ug gatasan! 

Kanhi opisyal sa United Nations, national convenor sa Gising Barangay Movement si Manny.