Yap: Tubig! Tubig! Tubig!

Monday, February 22, 2010

ANG tubig usa sa pinakabilhong gasa sa kinaiyahan, kung wala'y tubig walay kalibutan ug wala tang tanan dinhi. Sa Afrika, lisod ang tubig ilabina sa deserto, bililhon kaayo kini. Sa ato, tungod kay isla kita, swerte kaayo kita kay napalibotan kita og dili problema kini kay ga-awas-awas naman gani kini. Apan usa usab kini sa mga hinungdan sa kalamidad sama sa baha ug bagyo. Mga kalamidad sa tubig, apan ang pinaka-ngil-ad nga kalamidad mao nga awayan kini tungod sa negosyo.

Sa pagsulat niining column, gasugod na ang strike sa mga empleyado sa COWD (Cagayan de Oro Water District) tungod sa dili nila kuno makaon nga korapsyon sa sulod ilabina ang mga Board of Directors. Anaa gayu’y katungod kining mga empleyado nga mostrike tungod kay naa man sila’y pagpakabana sa organisasyon. Dili man usab ma-ataw-ataw ang serbisyo kay dili man tanan apil ug ila raman kunong himuon kini panahon sa break nila. Dili kuno nila undangon hangtod dili mautro ang mga nagdumala nila.

Have something to report? Tell us in text, photos or videos.

Dako kini nga kontrobersya tungod kay sa akong nasayran, nagsugod kini sa Bulk Water Supply nga contract nga gisudlan nila niadtong tuig 2006 kung wala ko nasayop. Kinig Bulk Water guidumala kini ni Pito Alvarez, usa sa pinaka-datong tawo sa Pilipinas nga naka-asawa Roa busa nagtukod siya anang maong negosyo. Anyway, wala kita nahibalo kung naunsa ang maong sabot nila, kung korapsyon hisgutan, na, dako kanang istorya kay wala’y tawong moangkon nga nangawat siya.

Kining panghitabo sa COWD bunga kana sa kahakog sa posisyon ug sa salapi. Lain lagi ning mga tawong makatungtong sa pwesto dayon kurat sa gahum kay buhaton ang tanan aron maadunahan to the extent of depriving others. Ang mga yanong empleyado, luoy kay nagkayod insakto dayon ang uban wala nagkayod pero mas daghan pag-kwarta nila. Unfair usab ang kinabuhi apan, sila ra gayud ang maka-usab niana kay naa man sa ila dapat maggikan ang pressure nga utrohon ang gadumala nila. Lauman lang nato nga ang mga tawong adunay gahum nga maka-utro sa maong sitwasyon buhaton nila ang tanan aron mahatagan og insaktong hustisya ang mga panghitabo. Pastilan ning tubig. Tungod sa tubig daghan maangin.

Unsa man gani ilang mga tagsa-tagsa agenda sa ilang mga lakang nga gipangbuhat, naglaum usab kita nga dili maapektohan ang serbisyo nila kay hinay-hinay na rabang naapektohan ang serbisyo. Sa Afrika nga nihit ang tubig, gaagas man gani ang gripo, ato pa kaha nga gipalibotan og tubig dayon daghan source nga gabugwak lang maglisod kita. Pastilan, mao ba kining gitawag tang demokrasya? Sobra-an na gayud kini to the point nga na-abuso na. Manghinaut kita nga masulbad kini sa madali nga panahon. Piniliay na raba, masakyan gayud kini sa politika ug sige okay raman masakyan basta kay dili biyaan ang insaktong pagpanerbisyo.