Yuta nahugno, 5 patay

Wednesday, March 17, 2010

PATAY ang lima ka mga laborer human natabunan og yuta niadtong Martes mga alas 3:30 sa hapon sa Taekwood Hills, Brgy. Balubal ning siyudad sa Cagayan de Oro.

Paingon nga mokalot og yuta sila si Bonifacio Abalo, 58, minyo, taga Brgy. Agusan ning siyudad; Armand Cabasan, 18, ulitawo, taga Purok-2, Brgy. Balubal; Phillip Goyo, 18, ulitawo, sa susamang dapit; Danny Luay, 18, ulitawo, taga Agusan ning siyudad ug Eladeo Tadle, 20, ulitawo, taga lungsod sa Malitbog, Misamis Oriental.

Have something to report? Tell us in text, photos or videos.

Ang maong mga laborer nagtrabaho sa Design Setter Construction Inc. ubos kang Engr. Elpedio Viola.

Si SPO3 Bermel Alina sa Police Station 6 (PS6) sa Puerto, kinsa imbestigador sa kaso nibutyag sa Sun.Star Superbalita nga posibleng adunay negligence sa maong insidente, hinuon padayon pang gisuta kung unsay kalapasan sa maong constructor nga nahitabo ang ingon.

Gisaysay ni Alina nga gikan pa sa ilang snacks ang maong mga trabahante dihang nibalik na sa ilang trabaho aron mokalot og yuta alang sa foundation nga tukoron.

Dihang niabot na sa walo ngadto napulo ka tiil ang kalawom kalit lang nahugno ang yuta hinungdan nga natambunan ang lima ka mga trabahante sa ilawom.

Gani nadungog pa sa mga kauban ang ilang pagpangayo og tabang hinungdan nga dali nga mikuha og pala ug gikalot ang yuta apan naglisod na tungod sa kadaghan sa yuta nga nitabon.

Gigamitan og backhoe aron masalbar ang mga biktima ug unang nakuha si Tadle kinsa duna pay ginhawa niadtong tungora hinungdan nga gidali pagdala sa Northern Mindanao Medical Center (NMMC) apan usa ka oras ang nilabay sulod sa balay tambalanan nakabsan kini sa iyang kinabuhi.

Samtang ang laing upat ka mga biktima luya na dihang nakuha gikan sa ilawom ug wala na naglihok apan gidala gihapon sa Puerto Community Hospital. Apan ang upat gideklarar nga dead on arrival sa mga doktor.

Matud ni Alina nga padayon pa nilang gisuta kung unsay kalapasan sa mga constructor ug walay pagbantay sa posibleng mahitabo.

Gani usa ka amahan sa biktima nibutyag nga makapila na kahigayon gipahimangnoan si Viola nga butangan og timber ang ilawom sa yuta tungod sa kadelikado nga mahugno apan daw wala lang kini magtagad.

Gikatahong wala na nagpakita ang maong engineer human nahitabo ang insidente.

Sa pagsulat ning balita, gidala na sa Divine Sheperd funeral homes ang lima ka mga patayng lawas.