GITUSAKTUSAK sa mga bala ang lawas sa usa ka gidudahang kawatan sa sityo Binaliw 3, bukirang barangay sa Binaliw, siyudad sa Sugbo pasado alas 12 sa tungang gabii.

Moabot sa 13 ka mga kabhang sa bala ang na-recover sa mga sakop sa Homicide Section sa Cebu City Police Office (CCPO) dihang ilang giduaw ang crime scene kagahapon.

Sun.Star accepts donations for victims of Typhoon Ondoy

Giila ang namatay nga si Maximo Padayugdog Jr, 23, usa ka mag-uuma nga nagpuyo sa nahisgutang dapit.

Nasayran sa gihimong pakisusi sa kapulisan nga ang biktima diha na sud sa ilang bay uban sa iyang 15-anyos nga kapuyo dihang dunay nitawag kaniya nga siya pagawson sa ilang bay.

Matod ni PO2 Lou Pagara nga nagdumili ang biktima sa paggawas hinungdang nagpabuto ang wa mailhing tawo.

Nisaka dayon kini sa ilang bay ug gisipa ang pultahan.

Nihangyo ang biktima ngadto sa tulo ka wa mailhing mga tawo nga di idamay ang iyang pamilya maong nikanaog kini kuyog na sa mga suspek.

Mao nalay sunod nadunggan sa iyang kapuyo ang sunodsunod nga mga buto.

Ang amahan sa suspek nga si Maximo Sr. nga nagpuyo unahan sa ilang pinuy-anan ang daling niabot ug maoy nakit-an nga nagbuy-od na ang biktima ug natusaktusak ang lawas sa mga bala.

Daling gidala ang biktima sa Cebu City Medical Center (CCMC) apan gideklarang dead-on-arrival.

Sa pasiunang paghiling sa kapulisan sa lawas sa biktima, ilang nakit-an nga nakaangkon kini og lima ka mga samad pinusilan sa tiyan, tulo sa walang batiis ug laing usa sa tuong batiis.

Gawas sa 13 ka mga kabhang, naka-recover usab ang kapulisan og laing duha ka mga slug usa niini napiyapi.

Matod ni Pagara nga ila pang pakigkitaan og balik ang kapuyo sa biktima sanglit sa ilang pagduaw sa crime scene wa kini nila maabti.

Apan ilang nasayran sa amahan nga ang kapuyo wa sab makaila sa mga suspek.

Sa pagsusi sa kapulisan sa barangay hall, ilang nasayran nga dunay daghang mga blotter batok sa biktima sa mga kasong pagpangawat.

“Mao na among gbay kon di ba kaha ni maoy motibo sa pagpatay niya,” nagkanayon si Pagara. CPL