USA ka giingong big time drug pusher sa dakbayan sa Lapu-Lapu maoy gitumbok nga utok sa pagpatay kang PO2 Jose Clint Cañete sa miaging tuig.

Kini maoy gitug-an sa usa ka habalhabal driver nga nadakpan sa kapulisan sa buybust operation sa miaging semana sa dakbayan sa Mandaue.

Si Canete gipusil patay niadtong Oktubre 21 diha sa may unang Mactan Mandaue Bridge habig na sa Mandaue gikan nitambong og hearing sa kaso labot sa drugas.

Ang kapulisan sa Mandaue ug Police Regional Office (PRO-7) pinangulohan ni Supt. Marvin Sanchez nipahigayon og buy bust operation niadtong Enero 9 sa may Park Mall nga niresulta sa pagkasikop nila ni Arnel Montero 37, taga lungsod sa Compostela ug Joseph Barbero, taga barangay Lusaran, siyudad sa Sugbo.

Sila nakuhaan og armas, ingon man gituohang mga shabu.

Sa imbestigasyon sa kapulisan, si Montero nga giingong usa ka gun-for-hire, giingong may kalambigitan sa pagpusil patay kang PO2 Cañete.

Siya niangkon nga siya ang nag-drive sa motorsiklo nga gisakyan sa gunman nga si Ronel Wagas, taga lungsod usab sa Compostela.

Iyang gibutyag nga si Wagas maoy nipusil makaupat ka mga higayon kang Cañete ug siya ang nagmaniho sa motorsiklo sanglit usa man siya ka habalhabal drayber.

Sa iyang extra judicial confession, iyang gibutyag nga si Wagas nipakuyog kaniya niadtong Oktubre 21 tungod kay aduna silay kuwartahon.

Niadto sila sa Palace of Justice sa Lapu-Lapu.

Didto, unang gikaestorya ni Wagas ang usa ka wa mailhing tawo ug paglabay sa pipila ka minutos nigawas si PO2 Canete.

Usa ka Paquito Oyao, kinsa nabilanggo pa karon sa Lapu-Lapu City Jail, maoy nagsugo kanila sa kantidad nga P20,000 base usab sa gisulti ni Wagas kaniya. Samtang si Wagas giingong tawo ni Oyao, kinsa nalambigit usab sa drugas didto sa ilang lungsod.

Si PRO-7 Director Ronald Roderos niingon nga ila nang giandam ang kasong murder batok ni Montero lakip na si Wagas aron malutsan og warrant ug madakop sa kapulisan.

Samtang si Supt. Vicente Premne Deputy Chief for Operations sa Mandaue City Police Office, niingon nga ilang ilakip sa pagpasakag kaso si Oyao.

Ang kapulisan nakakuhag record gikan sa Lapu-Lapu City Jail nga si Wagas nibisita kang Oyao sa bilanggoan duha ka mga adlaw sa wa pa mahitabo ang pagpatay sa pulis Cañete.

Ilang nasayran nga ang gikaestorya ni Wagas niadtong adlawa samtang gipaabot si Canete nga mogawas sa korte mao si Washington Oyao, igsuon ni Paquito, base sa hulagway nga gipakita sa kapulisan kang Montero.

(January 14, 2008 issue)
Write letter to the editor.Click here.