LAING gidudahang rebeldeng New People’s Army (NPA) ang napatay sa usa ka engkuwentro tali sa kasundalohan sa lalawigan sa Negros Oriental kagahapon sa buntag.

Laing duha niya ka mga kauban ang nadakpan, apan wa ilha una sa kapulisan.

Sun.Star accepts donations for victims of Typhoon Ondoy

Gawas sa wa pa mailhing lalake nga napatay sa engkuwentro mga alas 5 sa kaadlawon, nasakmit sab sa dapit nga naengkuwentrohan ang usa ka baby armalite.

Hangtod ning pagsuwat nagpadayon pa ang military sa ilang hot pursuit operations batok sa gidudahang mga rebeldeng NPA.

Pasado alas 5:00 kagahapon sa buntag, ang mga sakop sa 11th Infantry Battalion pinangulohan sa usa ka 1st Lt. Mutoc napahigayon og combat patrol operations sa brgy. Planas, lungsod sa Guiholngan.

Apan paghiabot sa may sityo Moog, ilang gikasugat ang labing minos 10 ka gidudahang mga armadong NPA hinungdan nga nahitabo ang lima ka minutos nga pinusilay.

Atol sa pinusilay, usa ka rebelde ang namatay nga wa pa mailhi hangtod sa pagsuwat ning taho.

Samtang usa ka baby armalite ang na-recover nga gituohang iya sa mga rebelde gani aduna pay report nga daghan pa sa mga rebelde ang nakit-ang samdan.

Matod ni Chief Insp. Petronillo Gracia, hepe sa Guihulngan Police station, nga di nila mahimong nganlan ang duha nga nadakpan kay giimbestigar pa sa military.

Ang patay nga lawas usab gi-claim na sa militanteng grupong Karapatan, matod ni Garcia.

Si Central Command (Centcom) Commander, Lt. Gen. Isagani Cachuela, niingon nga kini may kalabutan gihapon sa way hunong nilang kampanya sa pagsumpo sa suliran sa mga rebeldeng NPA.

Niadtong niaging semana tulo ka gidudahang mga rebelde ang nadakpan sa Army sa lungsod sa Zamboanguita, Negros Oriental sa usa ka checkpoint samtang laing usa ang napatay.

Ang tulo kanhi mga tinun-an dinhi sa Sugbo, apan duha lang ang taga Mandaue city samtang ang napatay taga Tayong, Talamban, siyudad sa Sugbo.

Ang nadakpan sa miaging semana giilang sila si Ma. Carla Alvarico sa Velez College; Carlo Cabahug sa University of San Carlos ug Absin Glen Felamer sa University of Cebu.

Matod sa ilang mga kauban nga sila di mga rebelde kon di aktibo lang nga mga sakop sa mga militanteng grupo sa kabataan sa College Editors Guild of the Phils. (CEGP) ug League of the Filipino Students (LFS).

Samtang ang napatay nga giilang si Reden Carpentero lumad nga taga Bohol, apan dunay mga kabanay sa Talamban, apan nilangyaw human ma-demolish ang ilang balay sayo ning tuiga sa sityo Tayong. (dugang taho ni MEA sa Sun.Star Cebu)