Ray Francis A. Gamban-USJ-R Intern

PATAY nang niabot sa tambalanan ang 2 anyos nga batang lalake nga naligsan sa iyang silingan kagahapon sa buntag sa dakbayan sa Lapu-Lapu.

Ang biktima nga si Rogene Taghoy, taga sityo San Roque, barangay Matumbo, naligsan sa iyang silingan nga si Wilo Elban Buena, 43, usa ka overseas filipino worker (OFW) kagahapon sa ala 6:30 sa buntag.

For updates from around the country, follow Sun.Star on Twitter

Si Buena padung untang mohatod sa iyang mga anak sa tunghaan dihang nahitabo ang maong aksidente.

Matod sa suspek nga nahinabi sa Sun.Star Superbalita, nga wa siya makabantay sa bata nga iyang naligsan sa iyang gimanehong Mitsubishi Adventure (plate no. YAS 830.)

Dugang pa niya nga nakadungog siya og syagit gikan sa ilang silingan nga adunay bata sa ilawom sa iyang sakyanan.

Si Shiela Taghoy, 20, iyaan sa biktima, daling nitawag kang Judith Saladaga, 29, kinsa nibira sa biktima sa ilawom sa sakyanan.

Matod ni Saladaga nga buhi pa ang bata dihang iyang gikuhit ug dayon gibira aron dad-on sa tambalanan.

Si Rogene daling gidala sa iyang amahan nga si Rodel sa Mactan Doctors Hospital apan gideklarar kini sa doktor nga dead-on-arrival (DOA).

Matod ni Buena nga hinayhinay siyang nagpadagan sa iyang sakyanan kay gamay ra man ang karsada sa ilang dapit.

Naglibog gyud siya nganong niabot ang bata sa karsada nga unta wa man gyud siyay nakitang bata sa atubangan.