2 hayan rason sa kuyap, pag-wild sa runner

Monday, July 12, 2010

DUHA ang mga posibilidad nga hinungdan nga nawad-an sa buot kadtong runner nga nilayat sa bintana sa Mandaue City Hospital niadtong Sabado sa gabii human siya mawad-i og panimuot sa iyang pagsalmot sa Energizer Night Run.

Updates on President Benigno Aquino III's presidency

Have something to report? Tell us in text, photos or videos.

Si Dr. Edwin Menguito, psychiatrist, nipasabot nga dako ang posibilidad nga nakasinati og hypoxia o hypoglycemia si Alexander Landera, sakop sa Danao City Runners Club, nga namatay gumikan sa grabeng samad sa dihang iyang gidasmagan ang bintana sa tambalanan nga ginama sa bildo dayon milayat.

Nipasabot si Menguito nga hayan nakasinati og hypoxia kun kakuwang sa oxygen sa utok ang biktima hinungdan nga kini nag-delirium.

Posibleng nakasinati sab kini og hypoglycemia kun kakuwang sa sugar diha sa dugo gumikan sa tumang exercise hinungdan nga nawad-an sab sa kusog ug nakuyapan.

“…nakuyapan man siya, kuwang sa oxygen ang iyang (Landera) brain. Na-revive siya but not enough oxygen sa brain mao to ang nahitabo (nagdagan-dagan sud sa ospital),” tipik sa pamahayag ni Menguito.

Nasayran niadtong Sabado sa gabii ang GMA-7 ug ang Energizer nipahigayon og night race kun lumba sa dagan sa may Reclamation Area habig sa Mandaue city.

Human sa lumba, si Landero, 19, ulitawo, taga Tuburan Sur, siyudad sa Danao ang kalit lang nakuyapan ug gitabang sa mga sakop sa Acert.

Pasado alas 10:00 sa gabii dihang naulian na sa panimuot si Landera.

Gidala siya sa Mandaue City District Hospital tungod kay nabantayan nga lain na ang linihukan ug ang iyang gipanulti.

Sa dihang niabot sa tambalanan, gialarma siya sa mga pulis tungod kay kalit kining nag-wild, nidagan gawas sa emergency room lahos na sa operating room.

Gani nabuak ang bildo sa pultahan sa operating room human niya giigo sa duha ka bukton samtang giablihan ang pultahan.

Sa dihang nakasulod na sa operating room nilahos kini sa paglayat gawas na sa building agi sa bintana sa recovery room.

Ang kapulisan sa dakbayan sa Mandaue pinangulohan ni Insp. Zosimo Jabas, PO2 Raniel Cartin daling niresponde sa alarma.

Ilang naabtan si Landero nga naglingkod pa kilid sa building ug gidala sa emergency room tungod sa grabeng samad sa iyang walang bukton nga maayong pagka-samad.

Apan pasado alas 11:00 sa gabii gipahibawo nalang sila sa mga tinugyanan sa Mandaue City Hospital nga nakabsan gyod sa kinabuhi. Gituohan nga nahutdan kinig dugo tungod sa dakong samad sa iyang bukton. (FVQ/DRT)