2 ka `killers’ gikiha; `utok’ wa giapil

Friday, July 30, 2010

PORMAL nang gipasaka sa korte ang kasong murder batok sa tulo ka mga tawo nga giingong nalambigit sa pagpusil patay sa usa ka negusyante sa dakbayan sa Carcar mga duha ka semana na ang nakalabay.

Apan, wa gilakip sa rekomendasyon sa Carcar City Prosecutor’s Office ang pagpasakag kaso batok kang Jay Camotes nga gitumbok sa duha ka mga suspek nga maoy nisugo ug nibayad kanila aron patyon si Eric Mendez Uraca niadtong gabii sa Hulyo 12.

Have something to report? Tell us in text, photos or videos.

Updates on President Benigno Aquino III's presidency

Silang Ronilo Montalla ug Lope Gicale Jr., pulos molupyo sa Barangay Lingigon, Argao uban si Rey Llanos, nagpuyo sa Poblacion, Sibonga girekomendar sa piskaliya nga pasakahan sa kasong murder kay giingong naghiusa sila aron pusilon si Uraca nga niresulta sa hinanaling kamatayon niini.

Padayong magtingkagol sa bilangguan sila si Montalla ug kaubanan samtang husayon ning ilang kaso kay di sila mahimong mopiyansa.

Wa na mosumiter sila si Montalla ug Gicale og counter-affidavit sa gipasangil nilang krimen apan si Llanos kusganong nihimakak nga duna siyay kalabutan apan wa hatagig gibug-aton sa piskaliya ang depensa sa nauwahi busa gilakip siyang gipasakahag kaso.

Si Clarisa Uraca nisaysay nga mga alas 6:30 sa gabii niadtong Hulyo 12 dunay duha ka mga tawo nga nagsakay og motorsiklo nga niabot sa ilang tindahan.

Unya nisud pa ang angkas apan ang nagmaneho sa motorsiklo ra sa iyang motorsiklo.

Matod ni Clarisa nga ang iyang banang si Eric naglingkod atubangan sa ilang pultahan nga nag-alsa sa ilang anak unya giingnan niya ang duha ka mga tawo nga ang display sa mga ligid anaa sa gawas.

Ning higayona, sa pag-atras sa usa sa mga suspek, kalit nga gipusil ang ulo sa iyang bana nga niresulta sa kamatayon.

Positibo niyang gitudlo si Montalla nga maoy nipusil sa iyang bana ug si Gicale maoy nagmaneho sa motorsiklo.

Sa iyang bahin, ang testigong si Edwin Sarda nitug-an nga ang iyang silingan nga si Llanos niabot sa ilang balay nga nangita kang Gicale ug Montalla.

Giingnan niya kini nga ang duha anaa sa balay ni Pepeng nga uyoan ni Gicale. (JECT)