MANAGSUON nga drayber sa traysikad gipamusil samtang nagpaabot og pasahero sa miaging gabii didto sa Mansueto village, Bulacao, Talisay city.

Kapulisan nagtuo nga ang maguwang maoy tuyo sa namusil ug napagan lang ang manghod.

Sun.Star accepts donations for victims of Typhoon Ondoy

Si SP03 Cleofas Bonjoc, desk officer sa Talisay City police station niila sa mga biktima nga sila si Danilo, 37, minyo ug si Ernesto Mitra, 34, ulitawo pulos mga lumolupyo sa Bulacao.

Ang imbestigasyon sa mga sakop sa homicide section nagbutyag nga ang managsuon nag-atang og mga pasahero sa kilid sa buhatan sa Bureau of Internal Revenue (BIR).

Kalit lang dunay namusil kang Danilo katulo ka mga higayon ug nisuway sa pagtabang ang manghod ngadto sa iyang maguwang.

Apan si Ernesto na usab ang gipamusil kalima ka higayon ug pulos sila nakaangkon og mga samad sa ilang kalawasan.

Ang mga biktima daling gidala sa Talisay District Hospital apan sila gideklarar nga dead on arrival.

Sa imbestigasyon nasayran nga si Danilo napriso na diay sa Maghaway Detention and Rehabilitation Center kay nakadunggab ug nakapusil.

Gisubay karon sa kapulisan kon di ba panimawos ang motibo sa pagpamusil ngadto sa managsuon.

Mga imbestigador nakakuha na sa ngalan sa suspek nga namusil sa managsuon apan di pa makabutyag niini ngadto sa mga sakop sa media.

Ang kapulisan dali sab kaayo nga nanghimakak nga dunay kalambigitan ang sinagop ni Mayor Socrates Fernandez sa pagpamusil.

Si Joavan Fernandez lumolupyo sa Mansueto village apan giklaro sa kapulisan nga lain ang nalambigit sa pagpamusil ug ila na kining gisundan.