2 ka mga saksi nahadlok

Saturday, March 13, 2010

PRIME witness sa kasong pagpusil patay sa duha ka mga batan-on sa Brgy. Tejero sayo ning semanaha ingon man ang iyang kauban sab nga laing saksi wa na motistigo tungod sa kahadlok nga panimawsan.

Ang kaso sa pagpatay kanila ni Kenneth Veloso ug Ana Marie Boquiron, human sila gipamusil di pa hingpit nga mahatagan og hustisya kay posibleng di pa mapasakaan og kaso ang mga suspek.

Have something to report? Tell us in text, photos or videos.

Kay ang saksi sa maong hitabo nga sila si “Gina Mae,” 17, ug ang nasamdan sa bukton nga si Jeffrey Villomo, wa na mobarog isip saksi batok kang Jordan Alueta, 18, taga Villagonzalo, Brgy. Tejero.

"The Manny Pacquiao Blog". Click here for stories and updates on the Filipino boxing champ.

Kagahapong adlawa, ipasaka na unta ang kaso batok sa suspek uban sa iyang mga kauban, apan wa kini madayon kay wa na mopakita sa kapolisan si Gina Mae.

Siya ang kanhi hinigugma ni Veloso nga kauban sa mga biktima atol sa hitabo.

Gituohang apil unta siya sa pusilon apan wa siya maigo sa pagrakrak.

Si SPO4 Dennis Moga sa Homicide Section niingon nga wa na sa ilang balay si Gina Mae.

Ang amahan sa babaye nga usa ka barangay tanod sa Tejero wa masayod kon hainang iyang anak.

Ang nasamdan nga saksi unta sa maong hitabo nga si Villomo nagdumili sa pagpirma sa affidavit nga gikuha kaniya human sa maong hitabo.

Matod ni Moga nga nangita sila karon og lain pang saksi nga makatabang kanila aron mapasakaan na og kaso si Alueta.

Dugang pa ni Moga nga posibling nahadlok ang mga saksi human gipusil patay sa miaging adlaw si Manuel Limpangog nga nagbilar sa namatay nga si Veloso.

Gitataw ni Moga nga way kalambigitan ang kamatayon ni Limpangog sa pagpusil patay kang Veloso.

“Wa toy labot sa nahitabo ni Veloso. Dunay laing atraso si Limpangog. Naatol lang nga didto siya gipusil sa haya ni Veloso,” matod ni Moga.

Gikatakda usab nga mohimo og legal nga lakang ang kapolisan batok sa barangay tanod nga maoy amahan sa usa sa mga saksi kay wa mokooperar sa kapolisan.Kini bisan kon saksi ang iyang anak sa maong hitabo.

Sa maong sitwasyon, hayan mabuhian sa kapolisan si Aldus Arregadas, 18, gituohang “hitman” sa gang nga gitumbok nga uban ni Alueta sapagpamusil.