BARANGAY tanod napusilan sa gidudahang duha ka mga tulisan atol sa checkpoint nga ilang gihimo uban sa kapulisan sa dalan Echavez pasado alas 3 kagahapon sa kaadlawon.

Duha niya ka mga kauban nga pulis nibawos pagpusil sa gituohang mga tulisan apan wa makaigo.

Ang biktimang samdan sa iyang wala nga dughan mao si Mariano Calvario, 58, tanod sa Barangay Lorega, siyudad sa Sugbo.

Matod ni PO1 Leroy Baguio sa Homicide Section nga nagpahigayon og checkpoint ang kapulisan sa Presento Uno sa may MJ Cuenco avenue.

Apan si Calvario uban nila ni PO1 Aldrin Pilayo ug PO1 Rey Iligan didto magpwesto sa may dan Echavez, layo sa checkpoint sa ilang mga kauban.

Kini sa pamasin nga makatayming sila og PUJ nga sakyan sa mga tulisan kay kusog usab ang tulis sa nahisgutang dapit.

Nakadawat gani og taho ang kapulisan nga kusog ang tulis sa maong dapit.

Gipara nila ni Calvario ug sa duha ka mga pulis ang PUJ nga gikan pa sa Talamban.

Ang PUJ ninghunong ug dayon nanganaog ang duha ka wa hiilhing mga lalakeng batan-on, usa kanila ang armado ug nideritso sa pagpusil sa biktima.

Ang duha ka mga lalake nanagan dayon sa interior portion sa Barangay Lorega.

Nibawos pagpusil sila si Iligan ug Pilayo, apan wa nila maigo ang duha.

Wa na lang nila gukda ang duha kay una nilang gidali pagdala sa ospital si Calvario, kinsa luwas na ang kahimtang sud sa Cebu City Medical Center (CCMC).

Dako ang pagtuo sa kapulisan nga mga tulisan ang duha ug nangahadlok nga madakpan sa kapulisan.