2 patay, 1 angol sa pagpangrakrak

Tuesday, March 9, 2010

DUHA ka mga batan-on, babaye ug lalake, ang nangamatay ug usa ang naangol dihang sila girakrakan sa lalakeng nag-wild kay gibuwagan sa iyang uyab.

Usa sa namatay human maigo sa KG9 machine pistol mao ang lalakeng gipuli kaniya sa iyang kanhi girlfriend.

Have something to report? Tell us in text, photos or videos.

"The Manny Pacquiao Blog". Click here for stories and updates on the Filipino boxing champ.

Maayo gani wa maigo sa pagpamusil sa suspek ang iyang kanhi girlfriend.

Mao nga nagtuo ang kapulisan nga selos ang motibo sa pagpamusil kagahapon sa mga alas 3 sa kaadlawon sa may likod sa kanhi provincial jail sa Villagonzalo, Barangay Tejero, siyudad sa Sugbo.

Ang nangamatay giilang mao sila si Kenneth Veloso, 18, high school drop out ug si Ann Marie Boqueron, 14, tinun-an sa 2nd year high school, sakop sa usa ka sorority/fraternity.

Ang nasamdan mao si Jeffrey Villomo, 18, nagpuyo sa maong lugar.

Ang suspek mao si Jordan Alueta, 18, sakop sa laing fraternity, taga Sityo Ponce sa mao gihapon nga barangay.

Sa pasiuna nga imbestigasyon nga gihimo nila ni SPO4 Alex Dacua, PO2 Edario Manatad, PO2 Jodan Batucan ug PO2 Julius Regis nagbutyag nga nag-estambay ang mga biktima uban sa ilang mga higala daplin sa gamay nga eskinita sa karsada.Ilang kauban si Gina Mae, 16, kanhi uyab sa suspek.

Kalit lang niabot ang suspek ug dayong pusil sa mga biktima nga nakalitan kaayo.

Si Gina Mae, nga wa maigo, niasoy sa Sun.Star Superbalita niingon nga sa wa pa ang hitabo, nitawag kang Veloso ang ilang higala nga si Mada aron pagpahibawo nga nagbahi sa pagpapangita kaniya ang suspek kay siya patyon.

Apan wa motuo si Veloso sa gisulti ni Mada kaniya.

Igo lang kining niingon nga andam niyang atubangon ang suspek aron makig-areglo kon unsa man ugaling ang iyang nasuk-an.

Tuod man, niabot si Alueta sa dapit ug nitimbaya sa grupo og “Hey! What’s up?” dayong bunot sa iyang dala nga machine pistol ug rakrak kanila.

Niingon si Gina Nae nga misuway sila sa pagsibat dihang nakakita sila sa armas ni Alueta.

Apan sa unang pagpabuto, naigo dayon si Boqueron ug nalamba sa dalan.

Si Veloso nga nagsunod kang Boqueron nasapid sab ang tiil kay nasabod kang Boqueron hinungdan nga natumba usab kini ug naabtan sa suspek.

Bisan natumba, gipusil kini sa makadaghan nga higayon ni Alueta sa makadaghang mga higayon. Si Villomo nga nagdagan naigo usab sa iyang seko.

Human sa pagpamusil daling nisibat ang suspek ug sa pagsuwat ning taho, wa pa madakpi.

Si Gina Mae niangkon nga iyang uyab si Alueta, apan dugay na niya kining gibuwagan.