3 ka kaso gipasaka batok Joavan

WA mahadlok ug labaw nang wa mahulga kang Joavan Fernandez kadtong negusyante nga labing uwahi nga giingong gitionan og armas sa sinagop sa mayor sa dakbayan sa Talisay.

Napasaka na kagahapong adlawa sa Talisay City Prosecutor’s Office (TCPO) ang mga kasong illegal possession of firearms and ammunitions, violation sa Comelec gun-ban ug ang grave threats.

Si Vincent Joe Castrodes, 28,ulitawo nga taga F. Llamas, Labangon, Cebu City niangkon sa mga tigbalita nga wa gyud maapiktahi ang iyang kinabuhi sa ilang panag-engkwentro karon ni Joavan.

“It doesn’t affect me. Wa ko mahadlok kay wa man koy sala niya. Ipadayon gyud nako ang akong kaso batok niya,” matod ni Castrodes.

Si Piskal Benjo Luther Macion nihatag og napulo ka adlaw ni Joavan aron sa pagtubag sa mga kaso nga gipasaka batok kaniya.

Apan si Joavan ni waive sa iyang katungod pagtubag sa kaso ug nisugot nga isang-at na kini sa korte.

Sila si P03 Arnold Damasco,P02 Roy Lofranco ug P01 Rusty Pelayo maoy nisang-at sa kasong illegal possession of firearms and ammunitions ug sa kalapasan sa Comelec gun-ban.

Samtang sila si SP01 Ricardo Balbutin, SP01 Ciriaco Luab ug P01 Rusty Pelayo maoy nagsilbe nga arresting officer kang Joavan sa reklamo nga grave threats ni Castrodes.

Way pyansa ang kasong gipasaka ni Castrodes apan moabot sa P160, 000 ang alang sa duha ka kaso.

Nalangay ang pagsang-at sa kaso kagahapong adlawa tungod sa brown-out nga niigo.

Wa mahinayon ang pagpasaka sab og kaso nga obstruction of justice batok kang Mayor Socrates Fernandez.

Kini tungod kay gikuhaan pa og testimoniya kagahapong adlawa sa Cebu Provincial Police Office (CPPO) kadtong mga police nga nagbantay sa sakyanan ni Joavan apan giablihan sa mayor ug may gikuha nga bag.

Ang testimoniya sa mga pulis mao unya ang basehan sa kapulisan sa pagpasaka sab og kaso batok sa mayor.

Related Stories

No stories found.
SunStar Publishing Inc.
www.sunstar.com.ph