TULO sa mga kapitan sa siyudad sa Sugbo nga gipiliang iapil sa line-up sa Bando Osmeña Pundok Kauswagan (BOPK) nipadayag gyud og interes nga modagan pagka-konsehal sa siyudad.

Giangkon nila ni Busay barangay kapitan Eliodoro Sanchez, Pahina Central kapitan Sisinio Andales ug Zapatera barangay kapitan Jose Marino Benedicto nga interesado silang modagan sa mas taas nga posisyon sa umaabot 2010 election apan matod nila wa maggikan kanila ang pagpadayag sa intensiyon.

For updates from around the country, follow Sun.Star on Twitter

Matod ni Sanchez nga mga kapitan sa kabukiran maoy nipalutaw sa iyang ngalan kay buot nilang dunay mahimong representative sa mga mountain barangay.

Iya sang gitug-an nga maayo siya og relasyon sa tanang mga konsehal, ma-south o north district man, maong siya nagtuo nga usa sa gipilian nga masud sa line-up.

Giangkon ni Sanchez nga kuwalipikado hinuon siya nga mahimong konsehal kay dugay na siyang nahimong kapitan ug duna say maayong agi sa iyang barangay.

Gikonsiderar usab ni Andales nga “honor and privilege” nga usa sa gikonsiderar apan matod niya wa pa kini klaro hangtod nga mohukom na gyud si Mayor Tomas Osmeña.

Apan iyang giangkon nga base sa iyang kasinatian ug sa iyang record, mo-qualify gyud siya sa taas nga posisyon.

Samtang si Benedicto niingon nga kon hatagan gyud siya og higayon ug ituboy usab, andam siya moserbisyo sa siyudad.

Matod niya nga di babag ang iyang kabatan-on.

Inay makahatag hinuon siya og “fresh perspective in terms of governance.”

Dugang niya nga di na usab siya bag-o sa serbisyo kay nahimo na siyang sakop sa Cebu Jaycees.

Niingon hinuon ang tulo ka mga kapitan nga mapilian man o sa dili nga maapil sa line-up sa BOPK, magpabilin sila sa partido ug di motabok sa pikas sukwahi sa nigawas nga taho.

Matod ni Benedicto nga kon duna may mobalhin sa laing partido sa rason nga wa siya mapili, nagpasabot lang nga ang posisyon maoy iyang giapas.

Matod niya nga kon serbisyo maoy tumong, mahimo mang konsehal sa siyudad o dili, mahimo gihapong mapadayon ang pag-serbisyo.

Samtang nagtuo sila si Andales ug Sanchez nga posibling intriga lang ang maong isyo.

Si Parian barangay kapitan Michael Ralota wa hinuon maapil sa giingong pilianan apan gituboy siya sa walo ka mga kapitan tungod sa maayo niyang record ug kuwalipikado usab siya.

Giangkon ni Ralota nga interesado gyud siyang modagan kay buot niyang dunay engineer sa konseho sanglit mapupos naman ang termino ni Konsehal Nestor Achival.

Apil sa gipiliang mopuli sa mga last-termer mao si Bo. Luz barangay kapitan Nida Cabrera.