UPAT ka mga tulonghaan sa dakbayan sa Talisay ang peligro sa kabataan kon dunay mahitabo nga linog ug sunog.
Kini tungod kay nagsikitsikit na ang mga buildings nga gipangtukod.
Ang mga tulonghaan mao ang sa barangay Pooc, Mohon, San Roque ug Tabunok.
Mao kini ang gibutyag sa hepe sa kabumberohan sa dakbayan sa Talisay nga si City Fire Marshall Felipe Canillas human sila nihimo og pakisusi sa mga school building sa kabarangayan.
Matod ni Canillas nga wa moagi sa ilang buhatan ang pagpangtukod og mga school building hinungdan nga wa nila dayon kini madiskitai.
Ang mga school administrator sa maong mga tunghaan gitambagan lang ni Canillas nga pangitaan gyud og paagi nga dunay kaagian ang mga tinun-an panahon nga dunay mga katalagman nga mahitabo.
Tungod sa nagsikitsikit na nga mga school building, gamay na lang kaayo ang kaagian sa mga tinun-an.
Kon dunay mahitabo nga trahedya, nameligro ang kabataan nga di dayon makagawas tungod kay gagmay na man lang ang agianan. (VLM)