UPAT ka mga tawo nga giingong mga sakop sa robbery gang sa kaulohan ang napatay sa engkuwentro tali sa mga operatiba sa National Bureau of Investigation (NBI) sa kaulohan.

Ang rumbo sa operasyon kagahapon sa hapon mao ang usa ka compound nga nahimutang sa may brgy. Estaca, Compostela, Sugbo.

Sun.Star accepts donations for victims of Typhoon Ondoy

Sa pagsuwat ning taho, wa pa mohatag og hingpit nga detalye ang NBI operatives kay nagpadayon pa ang ilang operasyon.

Si Chief Insp. Milo Dagasdas sa Compostela police nikompirmar nga kagahapon sa mga alas 4:52 sa hapon niabot ang mga operatiba sa NBI-Manila aron pagpahibawo kanilang duna silay operasyon batok sa gidudahang mga sakop sa Alvin Flores gang.

Ang gang maoy nitulis sa Rolex Store sa Glorietta 5 sa Makati city mga semana kapin na ang nakalabay.

Mga pasado alas 5 sa hapon, nakadungog na silag mga buto sa armas de fuego gikan sa usa ka balay nga gikoral nga giingong gipanag-iya sa usa ka langyaw.

Si NBI 7 Executive Officer Ernesto Macabare nga nahinabi sa Sun.Star Superbalita kagabii nga apil sa operasyon nikompirmar nga dunay namatay human sa gihimong operasyon sa mga ahente sa NBI.

Wa na mohatag og dugang detalye si Macabare sa naasoyng insidente kay padayon pa ang ilang pakisusi ug operasyon dihang gitawgan ning mantalaan.

Sa iyan bahin, si Atty. Renan Oliva nitug-an nga ang gi-operasyunan sa NBI mao ang Alvin Flores Gang nga atua nagbase sa Manila.

Matod ni Oliva nga ang mga ahente sa ilang ulohang buhatan sa Manila maoy nangulo sa operasyon.

Ang Alvin Flores gang di lang mga shopping mall ang tirada kon di mga banko ug armored van nga nagdalag mga kwarata.

Komon nilang modus ang pagsul-ob og uniporme sa mga pulis.Gikataho nga sa operasyon sa pagpanulis aduna Silay moabot nga 20 ka mga tawo nga kuyog.