LIMA ka mga construction worker ang nangamatay, unom usab ang nangaangol ug naa sa luwas nga kahimtang human mahugno ang firewall uban sa dakong beam sa gitukod nga edipisyo sa Gaisano Capital sa dan F. Pacaña ug F. Llamas sa may Felina Village, Brgy. Tisa, dakbayan sa Sugbo.
Gituohang ang wa pagtuman sa orihinal nga plano sa edipisyo ang hinungdan sa trahedya hinungdan nga gipahunong una ang construction sa building.
Matod sa CYC Construction, contractor sa proyekto nga ilang gikaguol ang insidente.
Nisaad silang mokooperar sa imbestigasyon.
Ang nangamatay mao sila si Deonny Dilan, 30; iyang manghod nga si Cristian, 27; Lyndon Melendres, 18; Teodulfo Detumal, 40; ug Argie Ceniza,27, pulos taga Barangay Luyang ug Baring, lungsod sa Carmen.
Samtang ang nangaangol ug nadala sa tambalanan tungod sa gagmayng bun-og ug mga samad mao sila si Jerome Siose, 19; Roel Pasaje, 26; Joy Manceras, 36; Arnel Pasasble, 23; Rixon Villegas, 27; ug si Noel Lucero, 23, pulos gihapon taga Carmen, pahinante sa CYC Construction nga gipanag-iya ni Charles Yu Chiu.
Ang nahugno mao ang firewall ibabaw sa ikatulong andana sa building nga gibana-banang may pito ka metros ang gitas-on ug nuybe metros ang gilapdon.
Gawas niini, uban sa nahugno ang dakong beam nga may gibag-on nga 24 inches by 13 inches.
Si Jesril Villena, lead man, nga nahinabi sa Sun. Star Superbalita, nagkanayon nga diha siya sa ubos sa building nag-supervise sa 15 ka mga tawo niya nga nag-overtime.
Nagtaod sila og kandula (ginama sa kabilya nga giporma og hagdanan ug gisumpaysumpay aron kapatungan og tawo) sa tumoy sa tulo ka andana nga building.
Niadtong higayona, 11 ka mga tawo ang ningtungtong sa kandula nga nag-finishing sa bong-bong sa ika-tulong andana sa building.
Samtang ang laing upat diha sa ubos maoy nagmasa sa semento nga gamiton alang sa finishing.
Nakamatikod na lang si Villena nga midahirig ang pader paingon kanila sa ubos.
“Mao to nga sa pagkakita namo, naglumba mi og panagan palayo sa lugar. Hangtod nga nahulog ang pader uban sa beam,” matod ni Villena.
Si Dave Dilan, survivor, nibutyag usab nga diha pa siya sa taas uban sa iyang igsuon nga si Cristian dihang may nangatagak nga mga tipaka sa semento gikan sa ngilit sa dakong beam tumoy sa pader.
Nahutdan sila og semento hinungdan nga nanawag siya sa mga kauban nga nagmasa sa ubos nga magpasaka sila og semento alang sa finishing.
Apan natagak ang “palita” ni Dave hinungdan nga siya nikanaog gikan sa iyang gitungtongan nga kandula.