TUNGOD sa pagdaghan sa mga batang manaygunay ug makikilimos sa kadalanan, nipahigayon og rescue operation ang Anti-Mendicancy Task Force sa Cebu City Hall niadtong Biyernes.

Onse ka mga barangay ang dungan nga gironda sa task force nga niresulta sa pagsignit sa dul-an 50 ka mga bata apil na ang pipila nila ka mga ginikanan.

Sagad sa nasignit nga mga bata naggikan sa mga barangay sa Capitol Site, Camputhaw, Sambag 1, Carreta, San Roque, Tinago, Sani Nicolas Proper, Mambaling ug Labangon.

Gisakay ang mga bata apil na ang pipila ka mga ginikanan sa Kaoshiong Bus ug gidala sa Parian Drop-In Center.

Ang ubang mga bata gi-claim na hinuon sa ilang mga ginikanan.

Sa interview sa GMA-7, gitug-an ni Isabelita Ganob, pangulo sa task force, nga pasakaan nila ang mga ginikanan kansang mga anak nagbalikbalik na og kasikop.

Samtang kadtong mga first-time offender ipaubos sa orientation alang sa responsible parenthood ug gipasidan-an nga ikiha na sa sunod nga higayon nga masakpan gihapon silang manlimos o manaygon sa kadalanan.

“Gawas nga risgo kaayo ni sa mga kinabuhi, ang ato sang kabataan nga mangayo sa kadalanan maka-cause sab og congestion sa traffic,” nagkanayon si Ganob sa TV interview. (CPL)