TULO na ka mga barangay sa lungsod sa Tuburan ang gibawian sa kapitolyo sa ilang mga service nga multicab.
Ang kapitolyo dunay napulo ka mga multicab nga gihatag ngadto sa Tuburan apil na ang usa ka ambulansiya niadtong Abril 23,2009.
Apan niadtong Hunyo 11 gibawian si Kapitan Julieto Talaugon sa iyang multicab samtang wa siya sa ilang barangay sa Lusong.
Si kapitan Talaugon nitug-an sa Sun.Star Superbalita nga gibawian na sab ang Barangay Summon ug Kalangahan. “Dako gyud kaayo og kagamitan ang multicab sa barangay tungod kay mao man kini ang sakyan sa higayon nga dunay emergency. Gigamit gyud ni 24 oras alang niadtong atong constituents nga manginahanglan,”matod ni Talaugon.
Lakip sa mga barangay nga bawianan og mga multicab mao ang Kabkaban, Caridad, Marmol, Mag-antoy, Macupa, Kansi ug Amatugan. Apan di lang ang multicab ang giplano nga bawion sa Kapitolyo tungod kay iapil man sab ang ambulansiya.
Si Bise Gobernador Greg Sanchez niingon nga siya ang naghatag sa maong mga sakyanan dihang siya ang acting governor niadtong higayona. (VLM)