IPA-demolish na gyud ni Mayor Tomas Osmena ang gatusan ka mga balay sa brgy. Mabolo, siyudad sa Sugbo nga giingong nagbarog sa kasapaan ug nag-ali sa kadalanan.

Kagahapon unta gi-schedule nga i-demolish ang maong mga pinuy-anan apan wa kini mahinayon.

Sun.Star accepts donations for victims of Typhoon Ondoy

Matod sa mayor nga wa siyay gipirmahang hold order maong kinahanglang ipatuman na gyud ang iyang kamandoan pag-demolis sa maong mga pinuy-anan kay di siya buot mahitabo sa Sugbo ang nahitabong pagbaha sa kaulohan.

Ang mayor niluwat og demolition order ngadto sa Squatters Prevention, Elimination and Encroachment Division (Speed) sa pagguba sa 80 ka mga pinuy-anan nga naa sa Back Pepsi.

Apan giingong moabot sa 300 ka mga bubong ang gikatakda gyung papahawaon sa ilang dapit sa may city abbatoir ug sa may kasapaan sa barangay.

Ang mga pinuy-anan nga nagbarog sa kasapaan giingong maoy mag-ali sa agianan sa tubig nga moresulta gyud sa pagbaha.

Apan matod ni Mabolo brgy. kapitan Rey Ompoc nga wa mahinayon ang demolition kay gihuwat pa nga ma-release ang gisaad nga P10,000 nga financial assistance sa matag bubong.

Matod ni Ompoc nga giproseso pa kini sa urban poor office maong samtang wa pay magamit nga salapi ang maapektohang mga residente, di lang una i-demolish.

Tungod kay duna may ihatag nga financial assistance, matod ni Ompoc nga din a sila hatagan og relocation site.

Gawas pa usab, matod ni Ompoc nga ang pinuy-anan sa mga residente di makonsiderar nga mga balay kon di mga barung-barong lang.

Ang uban nga nakasabot nga di gyud angayang tarukan og balay ang maong mga dapit boluntaryo nang niguba sa ilang mga pinuy-anan, matod ni Ompoc.