USA ka 81-anyos ang gitulis sud sa iyang balay sa lungsod sa Medellin, Sugbo.

Ang biktima nga si Leonora Ramos Pelayo nakaplagan nga samdan sa sud sa ilang balay sa Barangay Dayhagon sa iyang anak nga si Ritchie, kinsa niadto sa balay sa iyang inahan aron pagsusi kon nganong way motubag sa telepono, niadtong Sabado.

Sun.Star accepts donations for victims of Typhoon Ondoy

Dihang niabot, nakita ni Ritchie ang iyang inahan nga diha na sa sawog nga dunay samad sa ulo ug ubang bahin sa lawas.

Gituhoan nga ang krimen nahitabo niadtong Biyernes pa sa gabii.

Si Ritchie niasoy sa kapulisan nga ang iyang inahan nisukol tungod sa daghang nabuak nga botilya sa ilang kusina ug stockroom.

Sa pag-ab ot sa kapulisan sa dapit, namatikdan usab nila ang daghang buak nga botilya sa softdrink bottles, buak nga kahoy sa lubi nga dunay lansang, walo ka tiil nga nylon nga pisi nga gihikot sa doorknob sa stockroom, usa ka strap sa usa ka relo ug usa ka bahin sa posteso.

Base sa imbestigasyon sa kapulisan, ang mga tulisan ning-agi sa luyo nga bahin sa balay pinaagi sa pagguba sa kawayan nga koral.

Dihang nasud sa compound, gitangtang ang upat ka palid sa jalousie ug nisud sa stockroom, padulong sa kusina.

Dihang nasakpan kini ni Leonora, posible nga usa sa mga tulisan ang nibunal og kahoy sa ulo sa biktima.

Si Ritchie, kinsa gikan sa Sugar Mills sa Barangay Luy-a, nagsige og tawag sa iyang inahan apan way motubag.

Nabalaka siya busa nakahukom nga mosusi sa ilang balay.

Si Leonora nasud karon sa usa ka ospital sa siyudad sa Sugbo. Ang kapulisan duna na suspek sa tulis apan padayon sa ilang pagpaniid niini. (Sun.Star Cebu)