Abogado gikiha kay kliyente `gipaupawan’

Friday, July 30, 2010

NAG-ATUBANG og kasong obstruction of justice ang usa ka abogado kay giupawan niya ang iyang kliyente aron di mailhan sa mga testigo.

Si Atty. Abraham Rey Acosta girekomendar sa Cebu Provincial Prosecutor’s Office nga pasakahag kaso nga nalatid sa Presidential Decree (PD) 1829 kun obstruction of justice tungod sa insidente niadtong Marso 10, 2010 sa buhatan sa kapulisan sa lungsod sa San Remegio, dakbayan sa Sugbo.

Have something to report? Tell us in text, photos or videos.

Updates on President Benigno Aquino III's presidency

Gitumbok si Acosta nga nisuway sa paghadlok sa mga testigo sa usa ka kaso diin gilambigit ang iyang duha ka mga kliyente ug wa matagbaw giputlan ang buhok sa iyang mga kliyente aron di gyod mailhan sa mga testigo.

Kining giatubang nga kaso sa abogado resulta sa reklamo nga gisang-at ni San Remegio Police Chief Rully Lauron nga nagtumbok nga mga alas kwatro sa hapon niadtong Marso 10 samtang diha siya sa iyang buhatan San Remegio Police Station uban sa mga paryente sa biktima nga si Monaliza Cabataña kay nag-andam sa kaso nga ilang ipasaka batok sa duha ka mga suspek nga sila si Junydale Edaño ug Gladys Sinangore, niabot si Acosta unya gikwestyon sila niini.

Gikwestyon ni Acosta ang legalidad sa pagsikop nilang Edaño ug Sinangore ug nangutana usab kini nga nganong wa pa pasakahig kaso ang duha sud sa “reglamentary period” nga 36 oras busa niawhag siyang buhian ang mga suspek.

Apan, wa hatagig gibug-aton ni Lauron ang hangyo ni Acosta hinuon nipadayon siya paghimo sa inquest proceeding.

Samtang, gipahigayon ang inquest proceeding, ang abogado nihadlok sa mga testigo nga nitumbok sa mga suspek ug makaagwanta ba kon iyang putlan ang buhok sa mga suspek aron di gyod kini matumbok sa mga testigo. (JECT)