Akhro ‘gipusil’, patay

Sunday, March 21, 2010

SAKOP sa Alpha Kappa Rho nakit-ang patay sud sa iyang kuwarto nga wa nay kinabuhi ug dunay duha ka samad pinusilan alas 7:10 kagahapon sa buntag sa Lawaan-1, dakbayan sa Talisay.

Samdan sa iyang agtang ug walang kilid sa lawas si Dante Cabrera,31,ulitawo nga taga Block 3, Lot 10- Phase 3-B, Camella Homes.

Have something to report? Tell us in text, photos or videos.

Si P02 Epifanio Comendido, Jr. , imbestigador sa homicide section sa Talisay City police station niingon nga ang amahan sa biktima nga si Lorenzo,hingkod ang panuigon , nakadungog og duha ka buto sa armas pasado alas 2:00 kagahapon sa kaadlawon didto tungod sa balay sa iyang anak.

Click here for Election 2010 updates

Gisusi ni Lorenzo ang lawak sa iyang anak ug nakit-an niyang naghigda ra kini ug naghagok dayon nibalik sa ila ug natulog.

Alas 7:10 kagahapon sa buntag, ang mga higala sa biktima sayo nga namukaw sa ilang balay tungod kay nagsabot man sila nga magsugba sugba.

Si Judito Castillo kuyog sa duha ka mga higala niadto sa kuwarto sa biktima apan nakita niya ang dugo.

Dali nilang gitawag si Lorenzo aron maoy mosusi sa kuwarto sa iyang anak ug nasuta nga wa na kini kinabuhi.

Matod ni P02 Comendido nga posibleng kadtong pagsusi ni Lorenzo sa kuwarto sa iyang anak sa pagka kaadlawon ug nadunggan nga naghagok, naghingutas na diay kadto.

Duha ka anggulo karon ang gisubay sa kapulisan nga motibo sa kamatayon sa biktima. Una mao ang kalambigitan niini sa fraternity ug ikaduha mao ang pasangil nga responsabli kini sa mga kinawatay og wire sa poste sa Barangay Lawaan. Matod sa kapulisan, dunay criminal record ang biktima ug gituohang hinungdan nga nagkabuwag kini sa kapuyo. (VLM)