ASAWA anaa sa talandugon nga kahimtang human gidunggab sa iyang bana sud sa ilang balay sa barangay Siocon, Bogo city sa miaging gabii.

Ang biktima giila nga si Angelina Oliamot Intrampas, 48, samtang ang gikatahapan giila nga si Pedro Oliamot, 55.

Sa imbestigasyon sa kapulisan nasayran nga ang biktima naghigda sa ilang katre ug mao na lay iyang nakit-an nga nagpaingon kaniya ang iyang bana ug nadunggan nga niingon “Mag-unong ta,” hinungdan nga dali siyang nidagan.

Sun.Star accepts donations for victims of Typhoon Ondoy

Apan gigukod siya sa ang iyang bana nga nagdalag kutsilyo ug gidunggab ang iyang tuong abaga ug bukobuko.

Gidala ang biktima sa tambalanan sa lungsod sa Bogo samtang ang gikatahapan nasikop sa kapulisan human nitahan.

Sigon sa asoy sa asawa nga taudtaod nang iyang nabantayan nga magsigeg estorya ang iyang bana nga mag-inusara ug mosulti nga adunay gustong mopatay kaniya.

Pipila na usab ka adlaw nga wa na kiniy pahuway tungod kay di makatulog.

Kini ang gituohan sa kapulisan nga hinungdan nga nahimo niya ang krimen.

Didto usab sa barangay Pulangbato, mao gihapong siyudad, usa ka Pedro Invento, 52 anyos, minyo, nakit-ang patay nga naglutaw sa kadagatan sa maong lugar.

Sa imbestigasyon sa kapulisan, ang biktima nibiya sa ilang balay pasado alas 6 sa miaging gabii aron sa pagpanagat nga gitawag og sudsod.

Apan pasado alas 10 sa gabii niadtong Biyernes nakit-an siyang patay nga naglutaw sa dagat. (DRT)