TINUN-AN sa nursing sa usa ka pribadong tunghaan nisang-at og mga kaso batok sa giingong asset sa National Bureau of Investigation (NBI) 7 kay giingong gihilabtan ang iyang pagka-babaye bisan siya menor de edad.

Ang asset gipugngan una ning mantalaan samtang wa pa makuhai sa iyang habig.

Sun.Star accepts donations for victims of Typhoon Ondoy

Ngan sa reklamante nga menor gipugngan sab.

Hinuon, ang kiha gisang –at human unang nikiha og extortion ang giingong asset batok sa maguwang nga babaye sa biktima nga usa ka maestra sa pribadong tunghaan.

Giangkon usab kini sa dalagang nireklamo.

Ang giingong asset gipasakahan og kasong pagpanglugos, qualified seduction, grave coercion ug oral defamation sa 17 anyos nga dalaga kagahapon sa Cebu City Prosecutor’s Office.

Matod sa biktima kinsa 2nd year na karon sa kursong Nursing nga 16 anyos pa ang iyang edad dihang may relasyon sila ni Yee apan pinugos kini bugti sa pagpaeskuwela kaniya.

Nidugang siya sa pagbutyag sa pakighinabi sa GMA Balitang Bisdak kagahapon nga nilampos gyod ang suspek sa paglugos kaniya dihang siya gidala sa usa ka hotel.

Gikahadlokan niya nga di na siya makatapos sa iyang pagtungha ilabi nang gusto gyod niyang molampos kay wa na ang iyang amahan.

Iyang gitumbok nga napugos siya sa pagbutyag ning gibuhat sa asset ug pagpasakag kaso kaniya kay gipa-entrap ang iyang maguwang nga babaye niadtong Septiyembre dihang nasayod nga gilugos siya.

Apan, may nakuhang dokumento ang Sun.Star Superbalita nga ang maguwang sa biktima giingong nisuway sa pagpangilkil sa asset sa kantidad nga P3 milyones.

Nipahigayon og entrapment operation mao ang Regional Intelligence Division (RID) sa Police Regional Office (PRO) 7 dihang gihulga siyang pasakaan og mga kaso kon di siya mohatag sa giingong gipangayo niyang salapi. (JECT)