POSIBLENG managan pagka mayor ug bise-mayor sila si negusyante Jonathan “Atan” Guardo ug Lahug brgy. captain Mary Ann de los Santos kon dunay “clamor” alang niini.

Ang duha ka mga lider sa oposisyon niangkon atol sa ilang paglusad sa “Our (Opportunity, Unity, Reform) City” nga ila kini karong gikonsiderar aron makaangkon ang mga Sugbuanon sa bag-ong matang sa pulitika nga alang sa kahiusahan, di magbahinbabhin.

Sun.Star accepts donations for victims of Typhoon Ondoy

Kon madayon, si Guardo ang modagan pagkamayor samtang si de los Santos sa pagka bise-mayor.

Hinuon ilang gitataw nga sa pagkakaron wa nila biyai ang una nilang plano sa pagdagan sa pagka representante sa ilang tagsa ka distrito.

“We are not abandoning our plan,” nagkanayon si de los Santos.

Sa pagkakaron, wa pay klarong kandidato ang oposisyon sa duha ka mga labing taas nga posisyon sa Siyudad sa Sugbo.

Kon madayon man ang ilang plano nga sila ang mangu sa oposisyon, mamahimo nang four-cornered fight ang piniliay sa pagkamayor.

Laing ningpahibawo na sa ilang pagdagan pagkamayor mao sila si Bise-Mayor Michael Rama, Georgia Osmeña ug kanhi senador John Henry Osmeña.

Nakita ni Guardo nga di imposible nga modaog ang ilang tandem kon ilang basihan ang ilang performance sa labing unang higayon sa ilang pagdagan sa 2007 elections.

“One hundred forty thousand votes sa 4-cornered fight is already a winning vote,” tumbok ni Guardo sa botos nga nakuha ni de los Santos sa iyang pagdagan sa miaging eleksyon.

Busa nagtuo siyang kon madugangan ang mao nga botos ug sa kadaghan sa managan, dako kaayo ang ilang kahigayunang modaog.

Si kanhi Mayor Alvin Garcia, nangu sa Kugi Uswag Sugbo (Kusug), wa pay desisyon nga modagan.

Duna untay suway nga negusasyon tali kang Kong. Antonio Cuenco nga maoy ilang padaganon pagka mayor, apan kuli na kining mahitabo karon nga nakahukom na ang iyang anak nga si kanhi konsehal Ronald Cuenco sa pagdagan pagka konsehal ubos sa Bando Osmeña Pundok Kauswagan (BOPK).

Gitakda na ni Cuenco ang pag renounce sa iyang US citizenship karon nga nahukman na sa iyang pamilya nga subli siyang mosud sa pulitika.

Sila si Guardo ug de los Santos namahayag nga ilang papason ang utlanan sa north ug south Cebu City kay alang kanila kini “is best for the city.”

“We will work to tear down the walls that divide the north and the south of our beloved city,” niingon si de los Santos.

Matod ni Guardo nga bag-ong pulitika ang ilang pagadad-on ug ipresentar ngadto sa mga Sugbuanon.

“Black propaganda, name-calling, negative campaigning are all stuff from the mould of traditional politics. These are the kinds of politicking that our people want their leaders to leave behind,” matod ni Guardo.

Tulo ang ilang nakita nga gikinahanglan nga buhaton unta sa Siyudad, apan nahikaw karon: paghatag sa batakang serbisyo sama sa panglawas; pag-umol sa third district sa Siyudad; ug patas nga pag-apod-apod sa pundo ngadto sa kabarangayan.

“We have the CCMC (Cebu City Medical Center). But we feel it is mismanaged,” nagkanayon si Guardo.

Si Guardo nipasabot nga tungod sa kadako na sa populasyon sa Siyudad, gikinahanglan na niini ang ikatulong distrito.