NAANGOL ang duha ka mga lalake human molupad ug malimbuwad ang ilang gisakyang awto sa South Road Properties (SRP) sa may habig na sa Cansojong, siyudad sa Talisay kagahapon sa buntag.

Giingong sa kakusog sa dagan sa Honda Civic nga awto (plate number WGV444) nawad-an kini og kontrol hinungdan nga naigo sa gutter kilid sa dan.

For updates from around the country, follow Sun.Star on Twitter

Nilupad hinuon ang awto nga nakaagi pa gyud og usa ka balay kilid sa karsada una pa nitugpa sa paril unya milupad na usab ug nalimbuwad.

Ang mga residente nga nakasaksi sa maong paglupad nakuyawan ug nakuratan sa ilang nakita.

Samtang usa ka residente sa maong dapit nihulagway sa paglupad sa sakyanan nga sama sa iyang makita sa salida.

Ang sakyanan gimaneho ni Jonathan Edward Rafanan, nagpuyo sa Camputhaw, siyudad sa Sugbo, ug sakay niini nga si Gessel Pastelero, nagpuyo sa Naga City.

Ang duha gikan sa habagatang bahin sa Sugbo ug padulong na mobalik sa siyudad dihang naaksidente mga alas 5 sa buntag.

Si traffic enforcer Joshua Cabahug nga nahinabi sa Sun.Star Superbalita nagkanayon nga grabe gyud ang danyos sa awto.

Iyang gibutyag nga nalumping ang atubangan ug luyong bahin sa sakyanan.

Hinuon ang mga biktima daling gitabang sa mga lumulupyo sa maong dapit ug gidala sa Chong Hua Hospital sa siyudad sa Sugbo.

Nakaangkon og mga bali sa lawas ang duha apan naoperahan apan gikatahong luwas na ang kahimtang. (Jurdelyn C. Repaso-USJ-R Masscom Intern)