Bañoc: Good luck, Mrs. Arroyo
Ni Ruphil Bañoc
Sunday, March 21, 2010
More Sections
GIKAN sa Plan A ngadto sa Plan Z ang giandam ni Mrs. Arroyo sa iyang tinguha nga magpabilin sa gahom. Hinaot nga way dugo nga mobanaw. Sa iyang pagpamugos sa iyang kaugalingon ngadto sa katawhan – bisan siya nakahibawo nga siya dugay rang gisuka – dili niya igsapayan kung maguba ang tibook nasud.
Malumpag ba gud diay ang kalangitan kung dili maka-appoint si Mrs. Arroyo ug bag-ong Chief Justice? Dili. Apan ngano nga labihan man gyud siya nga nakasigingsiging sa Korte Suprema? Kay iyang gisiguro nga maplastar ang tanan alang sa iyang plano nga mahimong Prime Minister ubos sa sistema nga parlyamentaryo. Kinahanglan nga dili mahimong babag ang Korte Suprema. Tuloy ang Ligaya!
Have something to report? Tell us in text, photos or videos.
Click here for Election 2010 updates
Daghang higayon nga ilang gisuwayan nga usbon ang batakang balaod aron lang sila magpadayon sa ilang pagpahimos sa gahom. Una nila nga lakang ang peke nga People’s Initiative (PI) nga gibasura sa Korte Suprema nga niadtong higayona wa pa maghout sa mga appointee ni “Hello Garci”. Ilang gisunod ang Constituent Assembly, apan gisalikway kini sa mga katawhan. Nahudtan si Mrs. Arroyo ug mga kongresista sa oras.
Apan ang mga dautang nilag dili mohunong hangtod molampos ang dautan nila nga laraw. Kinahanglan nga mohimo sila ug dakong drama nga kunuhay interesado sila sa pililiay sa 2010. Mao nga ang Palaka (Partido Lakas-Kampi) nikuha og front candidate nga ginganlan og G iba, aw, Gibo. Apan klaro nga bugnaw pas ilong sa itoy ang suporta sa administrasyon ngadto kang Gibo.
Wala man gani makakumpleto ang administrasyon sa ilang line-up pagka senador. Ug ning umaabot nga adlaw, molayat ang mga taga-administrasyon ngadto sa secret candidate. Mahisama si Gibo sa bata nga giilugan og lollipop.
Apan dili diha mahuman ang ilang plano . Sigurista ang peke nga presidente. Busa iya na daan postihan ug mga kwestyonable nga personalidad ang mga institusyon.
Wa pa nianay labot ang iyang mga ‘private army’ nga nagtakuban pinaagi sa pagdagan sa partylist. Ilang gibaboy ang sistema sa partylist. Kung imong langkaton ang masakara sa pipila ka mga parylist, imong makita ang mga nawong sa mga kaalyado ug kapamilya ni Arroyo lakip na niini ang iyang anak nga si Mikey Arroyo. Si Mikey “marginalized”?
Nakalimtam ni Mrs. Arroyo nga dunay mas gamhanan nga kamot nga dili makita nga modirihir sa pag-alsa sa katawhan - ang Diyos.
Good luck, Mrs. Arroyo.
