DAW nadungog nako kini nga linya sa awit diha sa pag-ambak, paghilak sa kalipay, pagsayaw sa minilyon ka mga Pilipino human nidaog ang boxing hero nga si Manny Pacquaio batok ni Miguel Cotto. Kadako gayud nato nga garbo nga kita mga Pilipino – ug bout nato kining isinggit sa tanang suok sa kalibutan.

Bout natong ipanawong sa tibook kalibutan nga, oo, nasud kita nga nagkatibulaag tungod kay daghan ang bout mobiya; oo, nasud kita nga nagkalisod; oo, nasud kita kansang presidente ug mga mga opiyales mga kawatan; apan nasud usab kita sa mga ordinaryong Pilipino kansang panlimbasog sa kinabuhi inubanan sa pagtoo sa

Diyos ug garbo sa yutang natawhan.

"The Manny Pacquiao Blog". Click here for stories and updates on the Filipino boxing champ.

Gituman ni Manny ang iyang “para sa iyo ang laban na to.”

Ayangan usab kitang tanan karon mosaad ug motuman sa maong saad. Mohimo kita ug mga butang nga sarang nato ika-pasigarbo isip mga Pilipino. Atong pangitaon ang pagbag-o.

Daghan kanato – boxer man o dili – ang sa hilom naglihok aron mahibalik sa nawong sa atong nasud ang dignidad sa mga Pilipino ug hatagan ug katapusan ang dekadente nga sistema. Nindot hunahuaon nga ang gikusgon sa sukmag ni Manny, sukmag batok sa  pagpangaw-kaw, pamakak, ug paglim-bong.

Nindot hunahunaon nga maong sukmag – sa dili literal nga paagi – molandig sa nawong sa mga nihikaw sa mga Pilipino sa hustisya ug batakang serbisyo.

Ug kung wa masayod si Cotto kung diin gikan ang mga sukmag nga nilandig sa iyang nawong ug lawas tungod sa agresibong ataki ni Manny, mao usab ang gibati karon sa mga kaatbang ug nanaway ni Noynoy Aquino: Wa sila masayod diin gikan ang bul-og sa supporta nga gihatag sa minilyon nga mga Pilipino ngadto sa standard bearer sa Liberal Party.

Nakakita na usab sila ug aninipot sa kinauwahiang survey sa Pulse Asia: Noynoy, 44%; Villar, 19;  Escudero, 13%, Estrada, 11%.  Naa pa ba? Aw, Gibo diay, 2%.

Ang mga kritiko ni Noynoy miingon nius-os ang rating ni Noynoy kay 60% man siya sa SWS survey apan karon 44% ra sa pulse Asia . Kataw-anan. Wa sila nitug-an nga mas nidako ang iyang gintang sa nisunod nga si Villar.

Gipangutana ang mga gi-survey ngano si Noynoy man ang ilang gipili. Ang ilang tubag? Malinis. Hindi kurakot. Period. Wa sila maanod sa C-5 at Tiyaga ug Galing at Talino.

(birada_ruphil@yahoo.com)