Bañoc: Maayong presidente: andam ba kita?

Tuesday, February 9, 2010

DIHANG nipahibawo si Chiz Escudero sa iyang pagsibog gikan sa tinguha niini nga mahimong pangu sa nasud, ang sagad nga obserbasyon mao nga dili pa siya andam.

Ang iyang dumadapig nitubag: Ang mga Pilipino ang dili andam - ug dili si Chiz.

Have something to report? Tell us in text, photos or videos.

Click here for stories and updates on the Sinulog 2010 Festival.

Sa pagtaliwan si kanhi Pres. Cory Aquino daghan kanato nahinumdom ug nituo pag-usab nga posible diay ang usa gobyerno nga ligdong ug dili korap.

Daghan kanato nakadiskubre nga ang dugo nga naglatay sa atong kaugatan mao kadtong dugo sa atong mga bayani nga niula sa ilang dugo pagmatuod nga dili kita kaliwat sa mga ulipon.

Ug uban sa pagtulo sa atong luha, daghan kanato ang sa hilom misaad nga ipadayon nato ang gipakigbisogan ni Ninoy ug Cory.

Dihang nihukom si Noynoy Aquino nga modagan isip pangu nabuhi ang paglaom sa kadaghanan, ug ang nag-unang rason nga gihatag sa mga tawo nganong si Noynoy ang ilang gipili mao nga dili siya mangawat.

Apan human sa atong pagbangutan nibalik kita sa atong inadlaw adlaw nga gimbuhaton, ug naminaw ug nidawat pagbalik sa mga butang na atong gitawag nga “normal.”

Ang hunghong nga “normal ang korapsyon, normal ang korapsyon” maoy nitay-og sa atong kalig-on. “Mangawat man gani ang kapitan sa gamay nga barangay, ang mahimo pa kahang presidente.”

Usa ka butang ang a-tong nalimtan: luyo sa atong pagpaanod sa mga hunghong, nagluksolukso sa kalipay kadtong mga kawatan sa gobyerno ug kadtong gituohang nangawat kay sa ilang pagtuo hingpit na diay nga gidawat sa katilingban ang mga kawatan.

Tungod sa atong pagdawat sa mga kawatan, nadasig sila pagdagan sa posisyon. Imbis tulisok ang atong isugat nila tungod sa ila paghubas sa panudlanan, ato sila giabiabi sama sa usa ka hari.

Di na maihap ang mga eskandalo nga atong nasaksihan apan wa pa gyuy nasilutan. Kon ang nasakpang nanikas sa piniliay nahimong presidente, o ang mga heneral nga nalambigit gi-promote, o ang nangaon og nikantidad usa ka milyon wa manglipaghong, o nipalambo sa iyang negusyo pinaagi sa posisyon wa ma-ikog, o si Jocjoc Bolante, Abalos, Garcillano gawas-non, lauman mo ba ang usa ka madasigon nga publiko?

“Noynoy unta mi, sir, pero wa man gud siya’y kwarta. Kon mag Noynoy mi, kandidato baya mi, unsa na man lang ang amo ikasakbang kon mamalit ang among kontra?,” matud pas mga pulitiko.

Si Noynoy ba gyud ang dili andam o kita nga nagtuo nga normal ang korapsyon? Hinuktoki, lungsod. (birada_ruphill@yahoo.com)