ANAK nga gidudahang adik nisuway og sunog sa ilang balay ug nihulga sa kinabuhi sa iyang inahan, igsuon ug silingan ang gidakop sa kapulisan sa dakbayan sa Talisay.

Naabtan pa sa kapulisan ang suspek nga si Rogelio Fernandez, 39, ulitawo nga taga sityo Laray, San Roque nga moduslit na unta sa nuog nga giligo sa gasolina aron sunugon ang balay sa iyang ginikanan pasado alas 9:00 sa miaging gabii.

Sun.Star accepts donations for victims of Typhoon Ondoy

Ang inahan nga si Catalina Fernandez nitug-an nga kalit niabot sa ilang balay ang iyang anak nga nangayo og kuwarta ug nanghulga kaniya nga patyon ug sunugon ang ilang balay.

Ang suspek gipasanginlan nga nilungkab sa kandado sa pultahan ug gipanguha ang tulo ka cooking pots, tulo ka electric fan ug burner stove ug may kauban nga higala.

Human makakuha sa maong mga butang nanibat ang duha apan nibalik ang suspek sa ilang balay ug nanghulga sa iyang inahan.

Ang igsuong babaye nga si Juliet Cabo, 37, minyo, gibaharan sab sa suspek nga patyon kon mosumbong sa kapulisan.

Ang silingan nga diha sab nga si Adelaida Reyes, hingkod, minyo, giapil sa paghulga sa suspek.

Apan nanumbong gyud ang mga biktima sa kapulisan hinungdan nga naabtan ang suspek nga nisuway na unta sa pagsunog sa ilang balay.

Nakuha sa kapulisan nga ebidensya mao ang tunga sa galon nga gasolina ug panapton nga padulong na untang duslitan sa suspek.

Ang mga biktima desidido sa pagpasaka og kaso batok sa suspek nga kasamtangang gitanggong sa detention cell sa kapulisan.

Kasong grave threats ug attempted arson ang giandam sa kapulisan aron ipasaka batok sa suspek.