Bañoc: Ang akong barangay kapitan...
Ni Ruphil Bañoc
Tuesday, September 7, 2010
More Sections
ANG akong kapitan dili kawatan. Wa niya himoang negusyo ang pulitika. Wala siya magpuyo sa kinabuhi nga halayo ra kaayo sa iyang tinuod nga kita. Kay siya nasayod kung unsay makapapuling sa mga mata sa iyang mga konstitwente.
Ang akong kapitan dili abusado; dunay kaikog. Wa niya gamita ang sakyanan sa barangay alang sa personal nga gamit sa iyang pamilya, paryente ug suod nga mga higala diha sa pagpangaligo o suroysuroy.
Have something to report? Tell us in text, photos or videos.
Updates on President Benigno Aquino III's presidency
Ang akong kapitan ligdong. Dili maninghag. Kanunayng kalmado.
Wa niya himoang motel o beerhouse ang barangay hall.
Ang akong kapitan way gipinig. Iya kanunayng gisiguro nga ang mga batakang serbisyo ug oportunidad mapadangat gayud ngadto sa iyang mga katiga-barangay, ngadto sa mga niboto niya ug sa wala kagusto niya panahon sa piniliay. Wa niya putla ang tubo nga giagian sa tubig (water terrorism) padong sa iyang kontra sa pulitika. Iyang gipatuman ang mga ordinansa kinsa man ang maligsan.
Ang dalan duol sa iyang kontra iya lang gihapon gipasemento bisan nagbagulbol ang pipila sa mga hakog niya nga dumadapig.
Ang mga hinabang gikan sa gobyerno wa niya tagai sa iyang bodega aron ihatag ngadto sa iyang mga suod. Wa niya langanlangana ang baragangay clearance niadtong iyang mga kontra nga molukat niini.
Ang akong kapitan daling duolon ug sayon ra pangitaon. Di siya magtagotago, di siya maghupohupo.
Di siya molingiw. Di niya ituskig ang iyang liog.
Ang akong kapitan dili druglord, drug pusher o drug user.
Siya nahibawo sa kadaot sa druga diha sa kaugmaon sa mga batan-on ug sa pagkaguba sa di na maihap nga pamilya.
Iyang nakita ang daghang krimen ning katilingban tungod kay daghan na ang nagumon sa ginadiling druga. Wa siya mahaylo sa silaw sa salapi nga mahimo niyang mahakot kung piyongon lang unta niya ang iyang mga mata sa way pagpakabana.
Ang akong kapitan nagmahal sa kalikupan o sa palibot. Ang kahinlo maoy usa sa iyang mga priyoridad. Iyang gipanalipdan ang daginoton nga bahandi sa kalikupan nga mao na lay nahibilin sa nunot sa pag-abuso sa tawo.
Siya ang akong kapitan nga akong pilion karong umaabot nga eleksyon.
