USA sa mga barkong pasaheroan sa Sulpicio Lines Inc. (SLI) gitugtan nang makabiyahe gikan sa Manila nganhi sa Sugbo.

Kini human ang Maritime Industry Authority (Marina) nilibkas sa mando nga nagsuspenso operation sa usa sa pito ka mga roll on/roll off (roro) passenger vessels sa SLI human makatuman sa tanang requirements sa Marina Board, matod ni Administrator Maria Elena Bautista.

Sun.Star accepts donations for victims of Typhoon Ondoy

Si SLI Port Captain Nestor Ponteres niingon nga ang Marina niluwat sa mando niadtong Oktubre 29 pa, apan ang mv Princess of the South nakabiyahe lang nganhi sa Sugbo kagahapon tungod sa holidays.

Ang Mv Princess of the South, nga duna kapasidad sa mga pasahero nga 1,334, moabot sa Sugbo karong ala 1 sa hapon ug mobiya alang sa regular nga biyahe sa Manila sa alas 8 sa gabii.

Ang Mv Princess of the South apil sa walo ka gisuspensong mga pasaheroang barko sa SLI, human malunod ang mv Princess of the Stars sa June 2008, nga niresulta sa pagkamatay sa labing minos 800 ka mga tawo.

Si Bautista nisulti sa Sun.Star Cebu nga aron makabiyahe ang mv Princess of the South, ang SLI nituman sa requirement for protection ug indemnity cover nga mobalor og $1.5 million alang sa wreck removal (kana kon malunod).

Matod ni Bautista nga ang mv Princess of the South nipasar sab sa international safety manual (ISM) audit sa Marina diin 200 ka Marina ug CG personnel nisakay gikan sa Manila ngadto sa Cebu aron pagseguro nga ang barko nakasabot sa safety procedures. (EOB sa Sun.Star Cebu)