Eddie O. Barrita
Tikdul-Tikdol

HAYAN nga mabaraw ang computerized elections sa 2010 kay nisibog ang Total Information Management (TIM) isip lokal nga partner sa Smartmatic alang sa P7.2-bilyunes nga election automation project. “We may have to go manual,” matod pa ni Commission on Elections (Comelec) Chairman Jose Melo.

Kon di madayon ang computerized elections, balik tas uno, balik tas manu-mano.

For updates from around the country, follow Sun.Star on Twitter

***
Daghan ang nagtoo ug namasin, lakip na ang mga haligi sa Simbahang Katoliko, nga mawagtang na ang tikas sa eleksyon kon computerized na kini. Usa niini, si
Senador Richard Gordon, nag-ingon nga kadudahan kaayo ang pagsibog sa TIM gikan sa Smartmatic.

Kadtong naanad sa pagpanikas sa piniliay ug inihapay sa boto nga manu-mano di pang kadawat sa computerized elections.

***

Matod pa ni Kongresista Teodoro Locsin Jr. sa Makati, nabungkag ang consortium nga nidaog sa bid alang sa computerized elections kay nangayo ang presidente sa TIM og tunga sa bilyun ka pesos gikan sa Smartmatic.

Dali kining gihimakak ni TIM president Jose Mari Antunez. Tingalig iya ratong atik-atik sa Smartmatic.

***

Si Senador Chiz Escudero, usa sa gilantaw nga modagan sa pagka-presidente apan giingong bata pa kaayo sa  maong puwesto, niingon nga maayo na lang nga nitumaw karon ang problema sa TIM ug Smartmatic kay masulbad pa kini sa Comelec. Tiaw mog diha pas eleksyon mag-away ang TIM ug Smartmatic?

Nipasidaan na gani si Senate President Juan Ponce Enrile nga kon way eleksyon o kaha magyagaw ang computerized election, hayan dunay rebolusyon. Mao ni ang wa malantawi sa balaod alang sa computerized elections.

***

Gihatagan ni Comelec Chairman Melo ang TIM ug Smartmatic og hangtod karong adlawa aron paghusay sa ilang gikasungian.

Maayo tingaling kalimtan na lang ning duha ka mga kompaniya kay mahimong mag-uli ug mangi-ngisi ni sila atubangan ni Chairman Melo ug sa mga kamera apan delikadong magbugno na sab panahon sa eleksyon.

Lisod ra ba kon kwarta na gani maoy awayan.

Mag-unsa man nang pangiha sa ilang mga opisyales unya malawgaw ang piniliay ug di na motunhay ang gipangandoy ni Senador Escudero nga limpyo, matinud-anon ug klaro nga piniliay nga nagpakita gyud sa tinuod nga kabubut-on sa katawhan?

***

Apan yuna pa, klaruhon ta kuno ni. Matod pa ni Kongresista Pablo Garcia sa segundo distrito sa Sugbo, usa ka constitutionalist ug batid sa balaod, way gahom ang Comelec sa pagpatuman sa computerized elections kay segun sa Republic Act 9369, kinahanglan pa ang pilot testing niini.

Kay way pilot testing, di kapadayon ang Comelec sa computerized elections, matod pa niya.