Tipik sa balaod ni
Atty. Eddie O. Barrita

MINYO si Larry. Apan lagi kay dukirok sa babaye, nakauyab siya ni Marivic. Gipakaslan pa gyud niya si Marivic bisan dako siyang minyo. Tinuod nga dugay na silang nagbuwag sa iyang unang asawa apan wa pa maanular ang ilang unang kaminyuon kang Leslie.

Nakabaton og tulo ka mga anak sila si Marivic ug Larry.

Unsa man ang status sa mga anak nila Marivic ug Larry?

Sun.Star accepts donations for victims of Typhoon Ondoy

Ang ilang tulo ka mga anak illegitimate children kay nahimugso sila sulod sa usa ka bigamous marriage. (Article 176, Family Code of the Philippines).

Nganong bigamous marriage man ang kaminyuon nila ni Marivic ug Larry? Tungod kay minyo man si Larry kang Leslie sa dihang nagpakasal siya kang Marivic.

Ang pagpakasal ni Larry sa ikaduhang higayon samtang balido pa ang unang kaminyuon niya kang Leslie usa ka kaso sa bigamy nga gisilotan sa Revised Penal Code.

Ubos sa balaod, nulo ang ikaduhang kaminyuon kay bigamous marriage man kini. Sa ato pa, ang mga bunga sa ikaduhang kaminyuon mga illegitimate children.

Makagamit ba ang mga anak ni Marivic ug Larry sa apelyido ni Larry? Makagamit sila sa apelyido ni Larry bisan tuod kon sila mga illegitimate children.

Ang kinahanglang buhaton ni Larry mao ang pagluwat sa usa ka Affidavit for the Use of Surname of the Father. Ang maong affidavit kinahanglang irehistro sa Office of the Civil Registrar sa lungsod o syudad diin nahimugso ang ilang mga anak.

Mahimo sab nga sa Certificate of Live Birth mismo sa mga bata mopirma si Larry sa pag-angkon ug pagmatuod nga siya maoy amahan sa mga bata. Ning paagiha, diretso na nga irehistro ang bata nga magdala na sa apelyedo ni Larry.

Ang katungod sa usa ka illegitimate child nga makagamit sa apelyido sa amahan usa ka bag-ong kausaban sa Family Code of the Philippines.

Apan mahitungod sa pagpanunod sa katigayonan sa iyang amahan, katunga ra gyud ang iyang madawat sa madawat sa anak nga pursuso o legitimate child.

(Ang atong paghisgut-hisgot mahitungod sa balaud madungog na matag karon ug unya sa mga tampo nga dunay punto legal ngadto sa tulomanon nga "Alang Kanimo Kapuso" nga gisibya gikan sa ala-una ngadto sa alas dos sa hapon sa sibyaan DYSS Superadyo sa RGMA network.)