SI Georgia Osmena, igsuon ni Cebu City Mayor Tomas Osmena nga gusto sab nga magmayor, niingon nga hayan nga si Margot Osmena mao gyud ang molansad sa pagkamayor sa syudad.

Matod ni Georgia, si Margot nagpunay nag suroy sa mga kabarangayan sa north district, sukwahi sa pamahayag sa mayor nga modagan si Margot pagkakonsehal sa south district. Kon matinuod ni, delikadong madiskaril ang ambisyon ni Georgia ug ni Vice Mayor Mike Rama nga magmayor.

Sun.Star accepts donations for victims of Typhoon Ondoy

Gikataw-an lang ni Mike Rama ang pangangkon ni Georgia Osmena nga si Margot Osmena maoy padaganon sa iyang igsuon sa pagkamayor.

“I’m giving it to her, to the one who is making the story, to continue to enjoy her own imagination,” matod pa ni Mike Rama. Imagination bitaw na. Ang kuyaw kon matinuod ang maong imagination unya madayon gyud si Margot sa pagdagan sa pagkamayor sa syudad.

Dunay mga hunahuna nga nag-ingon nga si vice Mayor Mike Rama na gyud ang kandidato sa Bando Osmena Pundok Kauswagan (BO-PK) sa pagkamayor.

Dugay na kaayong nangandam si Mike Rama sa paningkamot nga makab-ot ang labing taas nga puwesto sa Cebu City Hall. Dugay na sab kaayong nagbansay-bansay si Mike Rama sa pagkamayor, di lang kay nagsigi siyag kanta-kanta didto sa Wine Shop.

Mahimong atong tugotan nga ang mga botantate sa syudad di magpili og singer sa pagkamayor. Pero, unsaon ta man kon singer ang mahimong mayor?

Mahitungod sa giingon ni Georgia nga si Margot Osmena maoy modagan sa pagkamayor, angay nilang hinumdoman ang giingon ni Margot, “If I do anything, I’d like to do it well.” Pero mahibaw-an ra gyud ang kamatuoran, matod pa ni Mayor Tomas Osmena, inig file na sa certificate of candidacy. Huwat na lang ta.

Wa pang kadisidir si Atan Guardo, lider sa oposisyon sa dakbayan sa Sugbo, kon kinsay ilang kandidato sa pagkapresidente, si Senador Manny Villar ba nga naghinay-hinay nag kamang dinhi sa Sugbo o kaha si kanhi presidente Joseph “Erap” Estrada, ang endorser sa iyang food supplement nga Arthro.

Si Lahug Barangay Captain Mary Ann delos Santos nikonpirmar nga nakitagbo sila ni Senador Villar pero wa mohatag og detalye aron di kahibawo si Mayor Osmena kon
unsay ilang gisabotan.

Ingon sa wa pangandami sa oposisyon kon kinsay ilang padaganon isip mayor ug bise mayor sa syudad.

Si Guardo modagan sa pagkakongresista sa south district batok kang Mayor Osmena samtang si delos Santos modagan sa pagkakongresista sa north district batok kang Cutie del Mar, anak ni Kongresista Raul del Mar. Di makompleto ang ilang pagtake-over sa syudad kon wa silay mayor ug bise mayor. Basin hinuon kon makadisidir silang duha nga mao na lay molansad sa pagkamayor ug bise mayor.