Barrita: Nasudnong Awit

Wednesday, March 17, 2010

MATAG saka sa ring ni Manny “Pacman” Pacquiao, paga-awiton ang Nasudnong Awit sa Pilipinas nga giulohan og Lupang Hinirang.

Matag human og kanta, mogawas dayon ang reklamo sa National Historical Institute (NHI) nga wa matuman ang gilagda sa balaod sa pagkanta sa atong national anthem.

Have something to report? Tell us in text, photos or videos.

Click here for Election 2010 updates

Ang labing ulahing gireklamo sa NHI mao ang pagkanta ni Arnel Pineda, vocalist sa Journey. Tungod niini, hayan nga mapasakaan og kaso si Pineda tungod sa iyang pagkanta.

Tiaw mo kana nga mabilanggo ka na hinuon sa imong pagkanta sa nasudnong awit.

Subay kana sa Republic Act  8491, An Act Prescribing the Code of the National Flag, Anthem, Motto, Coat-of-Arms and Other Heraldic Items and Devices of the Philippines.

Giklaro sa Sec. 35 sa maong balaod nga ang ulohan sa atong National Anthem Lupang Hinirang, dili Bayang Magiliw.

Ang Sec. 36 nagkanayon, The National Anthem shall always be sung in the national language within or without the country. 

Daghang maglalis niini. Dunay mga huna-huna nga nag-ingon nga wa pa maumol ang atong national language. Ang atong mga kaigsuonang mga Bisaya nagtuo nga unsa man gani kanang giingon nga national language sa pagkakaron Tinagalog kana nga nagmaskara o kaha gibunyagan lang og Filipino.

Mao bitaw nga gi-ban ni kanhi Gobernador Lito Osmena ang Tinagalog dinhi sa Sugbo ug dunay mga Rotary clubs ug Toastmasters clubs nga nagkanta sa Bisaya nga hubad sa Nasudnong Awit.

Di pa kana mao ang Filipino nga maoy national language sa Pilipinas. Kay ang gigamit nga Filipino sa pagkakaron Tinagalog nga gisagulan lang og dyutay nga mga pulong Bisaya.

Pananglit, gidawat nila ang Bisaya nga pulong nga bana. Kay sa mga Tagalog gud, pulos asawa maoy magdulog kay mababaye ug malalake, asawa may Tinagalog.

Ang problema ni Arnel Pineda mao kining giingon sa Sec. 37: The rendition of the National Anthem, whether played or sung, shall be in accordance with the musical arrangement and composition of Julian Felipe.

Kon di ka mosubay sa version ni Julian Felipe mahimo kang mabilanggo sa di molabaw sa usa ka tuig ug multa gikan sa P5,000 hangtod sa P20,000.

Huna-hunaa na lang ninyo pila ka buok ang yabag mokanta sa mokabat sa 90 milyunes ka mga Pilipino.

Di tingali maarang sa prisohan. Apan yuna pa, nag-ingon ang balaod nga kinahanglan nga kantahon ang nasudnong awit sa tukmang tuno sud ug gawas sa nasod.

Ang kanta ni Pineda didto sa gawas sa nasod. Ang atong mga hukmanan sa Pilipinas way hurisdiksyon sa mga salaod nga wa mahitabo sa sud sa atong territorial jurisdiction. Naglabad pa ang ulo sa Kalihim sa Hustisya kon unsaon pagkiha si Pineda.

(Sa mga reaksyon kang Atty. Eddie O. Barrita: E-mail: edbarrita@yahoo.com; Cell # 09165805285; Room 201, 18 Cherry Court Bldg., Gen. Maxilom Ave., Cebu City)