NAGDAGKOT na lang intawon og kandila ang mga pulis sa lungsod sa Consolacion kay giputlan silag kuryente ni Mayor Avelino Gungob. Panimawos kini ni Mayor Gungob sa way pupananghid nga pagtang-tang sa iyang duha ka mga bodyguards.

Ang mga pulis sa Consolacion maoy nabuthan sa iyang kasuko. Kon makakita ka nilang nagdagkot og kandila mora na hinuon og na-extend ang ilang Kalag-kalag.

Sun.Star accepts donations for victims of Typhoon Ondoy

***

“Dili pa na mao. Naa pa koy himuon lain to satisfy my needs aron iuli akong bodyguards. I want to tell them that the issue is still alive. Gitandog nila ang akong garbo,” matod pa ni Mayor Gungob. Basin og hinginlan na lang gyud niya ang mga pulis nga sa una iyang giplanohan nga ilisan na lang og mga barangay tanod. Pero atong makita nga garbo ra diay ang hinungdan niiningg tanan. Tingalig si Police Deputy Regional Director for Operations Marcelo Garbo maoy makasulbad ining maong panagbangi.

***

Klarong nasuko gyud si Mayor Gungob nga gitangtangtang ang iyang duha ka mga bodyguards. Wa gani siya pahibaw-a. Unsa man kahay iyang gikawilihan niadtong duha niya ka mga bodyguards?

Si Cebu Provincial Police Office Director Jesus Gaquing niingon sab nga dunay bug-at nga katarungan sa pag-reassign sa duha ka mga bodyguards ni Gungob.

Ang mensahe tingali ni Gungob nga ang mayor di lang tawo-tawo sa humayan kay way tawo-tawo sa humayan nga mamutol og kuryente.

***

Kon usisahon nimo ang gibuhat ni Gungob, di na ka makapangutana kon diin siya makat-on aning paghasol sa mga pulis. Sa dihang pulihan unta ang nauyonan ni Cebu City Mayor Tomas Osmeña nga hepe sa kapulisan sa dakbayan, mihulga dayon siya nga tangtangan sa ayuda ang kapulisan sama sa gasoline allowance, patrol cars ug uban pa. Lisod na kon magdaghan kining maong mga lider sa lokal nga kagamhanan.
***
Gilusad nila ni magpapatigayon Atan Guardo ug Lahug Barangay Captain May Ann delos Santos ang kampanya sa ilang plataporma nga Our Cebu City.

Alang kanila, ang syudad sa Sugbo, dili inyo, dili ila, dili amo, apan atong tanan. Maayong mag-amping sila niini kay maenad na unya sila sa ilang diskurso sa pagsultig atong syudad, atong karsada, atong merkado, atong suga, atong utang, atong basura, atong libaong ug uban pa.

Mahisama unya niadtong managkumpare. Ang usa mapahiubsanon kaayong niingon, “Pre, mao ni ang atong gamayng hacienda, atong gamayng pabrika, atong rancho, atong piggery, atong fishpond.”

Nisagbat ang iyang kumpare sa dihang nakakita sa iyang asawa, “Pre, gawapaha sa atong asawa, no?’ Daling nakatubag ang iyang kumpare, “Pre, ako nang asawa pre. Dili ato.”