Barrita: Pag-disinherit ang ginikanan, apohan o kapikas

Wednesday, July 28, 2010

GIHISGUTAN nato sa miaging kolum ang pag-disinherit sa ginikanan sa iyang mga anak ug uban pang mga descendant lagi kay sagad ang mga ginikanan man maoy dunay kabtangan nga ikabilin.

Pananglit ang anak maoy dunay kabtangan, mahimo ba niyang i-disinherit ang iyang mga ginikanan?

Have something to report? Tell us in text, photos or videos.

Updates on President Benigno Aquino III's presidency

Mahimo. Gilatid kini sa Article 920, New Civil Code nga naglista sa tukmang mga hinungdan nga mao kining mosunod:

Kon gi-abandonar sa ginikanan ang iyang anak, gitintal ang anak nga babaye sa pagpuyo sa kinabuhing immoral o kaha nisuway sa pagbuong sa kadungganan sa anak nga babaye.

Kon nakonbikto siya sa pagsuway sa pagkutlo sa kinabuhi sa iyang anak, sa kapikas sa iyang anak ug mga ascendants ug descendants.

Kon giakusahan niya ang iyang anak sa krimen nga gipahamtangan sa balaod og silot nga pagkabilanggo og unom ka tuig o labaw pa unya ang maong akusasyon naprobahan sa tinumo-tumo lang.

Gipahimo ang iyang anak og testament pinaagi sa tikas, pamun-og, panghulga, dautang impluwensya o kaha gipausab ang nahimo nang testament. Nakonbikto siya sa kasong adultery o kaha concubinage uban sa kapikas sa naghimo sa testament.

Nahanaw na ang iyang parental authority segun sa mga paagi nga gilatid sa balaod.

Nagdumili siya sa pagsuportar sa iyang mga anak ug mga descendants sa way igong hinungdan ug kon ang ginikanan nisuwat sa pagpatay sa anak, gawas lang kon nagkauli na ang ilang maayong kabubut-on.

Gilatid usab sa Article 921, New Civil Code ang mga hinungdan sa usa ka bana o asawa sa pag-disinherit sa iyang kapikas ug mao kining mosunod:

Nakonbikto siya sa pagsuway sa pagpatay sa iyang kapikas, mga ginikanan sa kapikas ug mga anak sa kapikas.

Giakusahan niya ang iyang kapikas sa krimen nga gipahamtangan sa silot nga pagkabilanggo sa unom ka tuig ug labaw pa unya namatud-an nga ang pasangil di tinuod.

Gipahimo ang iyang anak og testament pinaagi sa tikas, pamun-og, panghulga, dautang impluwensya o kaha gipausab ang nahimo nang testament. Kon nakahimog siyag butang nga hinungdan alang sa legal separation, pagkahanaw sa parental authority o kaha nagdumili siya sa pagsuporta sa iyang kapikas sa way igong hinungdan.

Klaro nga ang disinheritance maoy pagsilot sa dautang binuhatan sa usa ka eredero, anak man o ginikanan.

(Ang atong paghisgut-hisgot mahitungod sa balaud madungog na matag karon ug unya sa mga tampo nga dunay punto legal ngadto sa tulomanon nga “Alang Kanimo Kapuso” nga gisibya  gikan sa ala-una ngadto sa alas dos sa hapon sa sibyaan DYSS Superadyo sa RGMA network.)

(Sa mga reaksyon kang Atty. Eddie O. Barrita: E-mail: edbarrita@yahoo.com; Cell # 09165805285; Room 201, 18 Cherry Court Bldg., Gen. Maxilom Ave., Cebu City)