Barrita: Reklamo batok sa mga oportunistang taxi driver

Wednesday, September 8, 2010

USA sa nagsunod ning atong kolum ni-text kanato bahin sa iyang reklamo batok sa iyang giingon nga opurtunistang mga taxi driver:

“I am Rey Pino. Just want to report opportunist taxi drivers. Here are their plate numbers: GXM-557 (Ken Taxi) and GWN-621 M&J Taxi). Gikan mi sa Chong Hua (Hospital) then huwat mi taxi para going home kay buntis man ako wife. Wala sila magpasakay kay alkanse kuno sila kon mag-meter. Hope for your action. Thanks in advance.”

Have something to report? Tell us in text, photos or videos.

Updates on President Benigno Aquino III's presidency

Dugay nang nagpasidaan ang mga opisyales sa Land Transportation Office (LTO) nga ang bayran lang sa pasahero sa taxi mao ang unsay kantidad nga gipatak sa metro. Wa na kadtong sa una nga sabot-sabot lang. Ang drayber nga mosupak niini mahimong itaho ngadto sa LTO aron kapahamtangan sa tukmang silot nga naglakip sa bug-at nga multa ug pagsuspenso sa lisensya.

Way di gustog dakong kita pero mas maayo nga subayon na lang ang lagda sa LTO. Angay mahibaw-an nga ang tanan pulos naglisod. Kon ang drayber gustog dakog kita, ang pasahero nagdaginot sab sa iyang kwarta.

Duna pa gyuy mga drayber nga magpilig pasahero. Kon ang usa ka drayber modumili sa pagpasakay sa usa ka pasahero sa way igong hinungdan, pahamtangan siyag multa nga P1,500.00 ug suspensuhon ang iyang lisensya sa duha (2) ka buwan. Kon ang operator nasayod o kaha nitugot niini, suspensuhon sab ug duha (2) ka buwan ang iyang OR & CR.

Samang multa ipahamtang niadtong mga taxi kansang mga metro tampered, guba, mini o kaha giusab ang selyo. Kitang sigig sakay og taxi makabantay sa mga metro nga kusog modagan kay nahibawo man kita kon pila ang sagad nga patak sa metro sa atong gibyahian.

Daghang mga nakasinati sama sa nasinati ni Rey Pino apan nagpakahilom lang kay kapuyan na nga moreklamo. Samo na alang kanila. Total daghan na man sab ang mga taxi nga nagbyahian dinhi sa dakbayan sa Sugbo.

Pero kon way mosumbong sa LTO, magpadayon kining mga opurtunistang mga drayber sa taxi nga ang ilang kaugalingon ra maoy gihuna-huna. Wa magtan-aw nga ang mga pasahero naglisod sab og pangitag kwarta aron makasakay og taxi aron ang mga drayber duna say panginabuhi.

Manghinaot kita nga atiman sa LTO kining nahitabo kang Rey Pino. Angay nga ipakita sa LTO nga di lang sila kutob sa warning. Moaksyon gyud.

(Ang atong paghisgut-hisgot mahitungod sa balaud madungog na matag karon ug unya sa mga tampo nga dunay punto legal ngadto sa tulomanon nga “Alang Kanimo Kapuso” nga gisibya gikan sa ala-una ngadto sa alas dos sa hapon sa sibyaan DYSS Superadyo sa RGMA network.)

(Sa mga reaksyon kang Atty. Eddie O. Barrita: E-mail: edbarrita@yahoo.com; Cell # 09165805285; Room 201, 18 Cherry Court Bldg., Gen. Maxilom Ave., Cebu City)