Barrita: Sona ug kontra-sona

Thursday, July 29, 2010

GILABHAN ni Presidente Noynoy Aquino ang miaging administrasyon sa iyang State of the Nation Address (Sona) niadtong Lunes atubangan sa joint session sa Kongresso.

Gibutyag niya ang nagkalandrakas nga mga pangurakot sa miaging administrasyon, ang pagpalabig gasto sa national budget nga P100 bilyunes na lang maoy nahibilin ingon man ang nanghinobrang pagpalit og bugas gikan sa gawas sa nasod.

Have something to report? Tell us in text, photos or videos.

Ang iyang Sona maoy pagbunal-bunal sa miaging administrasyon.

Updates on President Benigno Aquino III's presidency

**

Wa pautang ang mga alyado ni kanhi Presidente Arroyo. Si House Minority Leader Edcel Lagman nidiskurso sab sa iyang counter-Sona bisan pa sa mga pahimangno sa di pagsumbalik sa Sona sa president kay hilabihan ra ba kataas sa iyang approval rating.

“But when the Emperor wears no clothes, can I honestly tell you that his robe is regal and majestic? nagkanayon si Lagman.

Ang nahitabo mao nga dunay Sona ang presidente, duna say kontra-Sona ang wa makauyon sa iyang Sona.

**

Duna hinuoy mga butang nga angayang klaruhon sama sa pagpatuyang og gasto sa miaging administrasyon sa tinuig nga budget nga nabinlan na lang og P100 bilyunes.

Sumala sa website sa Bureau of Treasury, P788.8 bilyunes kon 51 porsento pa lang sa P1.5 trilyunes nga budget karong tuiga ang nagasto kutob  sa Hunyo 30 ning tuiga.

Gibinlan pa diay og katunga si Presidente PNoy para duna pa siyay magasto sa nahibiling unom ka buwan nign tuiga.

***

Hilabihan diay kadaghan ang bugas humay nga gikompra sa National Food Authority (NFA) nga matod pa ni Lito Banayo, bag-ong administrador sa NFA, “We are swimming in rice.”

Dunay pay umaabot nga shipment sa duha ka milyon ka sakong bugas alang sa Central ug Eastern Visayas ingon man sa mga dakbayan sa Pagadian ug Dipolog.

Di na problema nga magkuwang tas bugas. Ang problema na lang sa bag-ong administrasyon mao nga ang katawhan duna untay kwartang ikapalit og bugas.

Ang mga militanteng pundok gusting ipanghatag na lang sa gobyerno ang sobrang bugas ngadto sa upa ka milyon ka mga Pilipino nga di makakaon og katulo sa usa ka adlaw.

***

Dunay plano si Cebu City Vice Mayor Joy Augustus Young nga magpalit ang syudad og mga eroplano nga mobalor og P4.6 milyunes gikan sa Department of Education nga kapin nas 40 anyos ug giagop-op na.

Gamiton kini alang sa rescue operations apan delikado kon ang magsakay mao na hinuon ang rescue-hon.

Samot na kon mga opisyales sa syudad maoy sakay.

Ingon pas taga Cabadiangan, nangita lang gyud silag bun-og sa lawas.