Barrita: Torture

Wednesday, September 1, 2010

GIPIRMAHAN ni kanhi Presidente Gloria Macapagal-Arroyo ang Republic Act 9745, ang Anti-Torture Act of 2009, niadtong Nobyembre 10, 2009, nga naghimong kriminal sa mga kaso “torture and other cruel, inhuman and degrading treatment or punishment.”

Ang silot gikan sa arresto mayor (pagkabilanggo sulod sa usa ka buwan ug usa ka adlaw ngadto sa unom ka buwan) ngadto sa reclusion perpetua (40 anyos nga pagkabilanggo), depende sa gibug-aton sa salaod nga nahimo.

Have something to report? Tell us in text, photos or videos.

Updates on President Benigno Aquino III's presidency

Sumala sa maong balaod, ang physical torture naglakip sa systematic beating o hinan-ay o sinistema nga pagkulata, pagpagutom, paggamit og electric shock of pakuryentihan, pasoan og sigarilyo, ug pagpanglugos, among others.

Sa Estados Unidos, usa sa mga paagi sa torture mao ang gitawag nga waterboarding diin buboan og tubig ang usa ka tawo kansang nawong gitabonan og panapton, busa maglisod siyag ginhawa ug natuo nga hapit na siya malumos.

Samtang ang mental ug psychological torture naglakip sa pagtaptap sa mga mata, dugay nga pagsukit-sukit o interrogation, pagdagmal sa mga sakop sa iyang pamilya, paghikaw sa katulog ug uban pa.

Giklaro sa maong balaod nga di mahimong gamiton nga katarungan sa paggamit og torture ang gubat, kagubot politika ug ubang mga emerhensya.

Mahimong mabilanggo sa tibuok kinabuhi ang usa ka tawo nga nakahimog torture kon kini mosangpot sa kamatayon sa usa ka tawo, mutilation (Sa balaod gi-define kini nga mao ang pagkadaot sa usa ka reproductive organ sa usa ka tawo.

Laing definition niini mao ang pagkaputol sa bisan unsang bahin sa lawas sa tawo, lakip na sa pagkabuta.), torture nga naglakip sa pagpanglugos ug ubang abusing sekswal unya ang biktima nabuang, na-impotent (sa lalake, din a mobarog ang kinatawo), nabuta o nabaldado sa tibuok kinabuhi, ingon sa pagtorture sa mga bata (nag-edad og ubos sa 18-anyos).

Ang bag-ong probisyon sa maong balaod mao ang gitawag nga command responsibility mahitungod sa mga sakop sa military ug sa kapulisan. Ubos sa command responsibility, ang mga superior nga mga opisyales sa military ug sa kapulisan dunay tulubagon kon nakahimog torture ang ilang mga sakop.

Ang Commission on Human Rights (CHR) maoy gitahasan sa maong balaod sa pagpatuman niini. Ang Pilipinas usa ka signatory sa Convention Against Torture and other Cruel, Inhuman or Degrading Treatment or Punishment.

Gilauman nga makapamenos kini sa paggamit sa torture aron pagpugos sa usa ka suspetsadong kriminal sa pag-angkon sa usa ka krimen. Kay matod pas usa ka estorya, kon kulatahon ka, maahat kag angkon nga ikaw maoy nagpatay ni Magellan.

(Ang atong paghisgut-hisgot mahitungod sa balaud madungog na matag karon ug unya sa mga tampo nga dunay punto legal ngadto sa tulomanon nga “Alang Kanimo Kapuso” nga gisibya  gikan sa ala-una ngadto sa alas dos sa hapon sa sibyaan dySS Superadyo sa RGMA network.)

(Sa mga reaksyon kang Atty. Eddie O. Barrita: E-mail: edbarrita@yahoo.com; Cell # 09165805285; Room 201, 18 Cherry Court Bldg., Gen. Maxilom Ave., Cebu City)