Barrita: Tulis para tagay?

Thursday, March 11, 2010

TULO ka tawong nanag-inom apan nahutdan nag ikatagay, nangitag kinsay ilang matulis aron duna pa silay ikatagay. Maoy ilang nasugatan si Carlo Mangitngit, 14-anyos nga sacristan sa Alliance of Two Hearts Parish nga gipapalit sa ginikanan og kamunggay niadtong Dominggo sa buntag didto sa Horseshoe Hills, Banawa nga sakop gihapon sa Guadalupe.

Ilang gitulis, gipusil ug gikuhaan sa iyang 3310 nga cellphone balor og P500. Giprenda ang cellphone og P200, unya balig silag tagay. Pastilan, naunsa na man ni? Manulis para dunay ikatagay?

Have something to report? Tell us in text, photos or videos.

"The Manny Pacquiao Blog". Click here for stories and updates on the Filipino boxing champ.

***

Walo ka oras nga nakigbugno sa iyang kinabuhi si Carlo Mangitngit hangtod nga nabugtoan siya sa iyang gininhawa didto sa Vicente Sotto Medical Center.

Mahuna-huna nato ang kasakit nga iyang gibati, di lamang gikan sa samad  nga iyang naangkon, kon di sa mga sa kapait sa mga damgong nangahanaw sa dihang nikisdom na ang iyang panan-aw ug ningitngit nang iyang palibot.

Laing kinabuhing nakalas tungod sa tulis sa cellphone. Ang mas labing pait kay nakalas ang kinabuhi sa usa ka batan-on nga hayag pa untag kaugmaon kay dunay mga lampingasan nga gusting magpadayon og tagay.

***

Nasikop dayon sa kapolisan ang tulo nga sumala pa sa mga taho niangkon nga niapil sa pagtulis kang Mangitngit, lakip sa usa usab ka menor de edad.

Mas sakit kining paladungon kay sumala pa sa atong tinubdan, ang biktima ug ang mga suspetsado sa pagtulis kaniya, managkaila da kay pulos taga Banawa.

Sakto si Cebu City Mayor Tommy Osmeña nga angay nga pasidunggan ang mga sakop sa kapolisan nga nakasikop ning tulo ka mga gikatahapan. Mas mayo gyud unta ang crime prevention. Apan unsaon nahitabo na man, sulbaron na lang ug nasulbad gyud.

***

Laing punto ni Mayor Tommy mao ang iyang awhag sa Commission on Elections (Comelec) sa subling pag-usisa sa ilang gipahamtang nga gun ban alang sa piniliay sa Mayo 10.

Tungod niini, kadtong mga off-duty nga mga tinugyanan sa balaod, gawas lang niadtong dunay exemption, din a makadala sa ilang service firearm tungod lagi sa paglikay nga himuon silang private army sa mga politiko.

Ang nahitabo mao nga ang mga pulis nga off-duty was pusil ug ang mga kriminal na hinuon maoy dunay pusil.

Sa kadaghan sa mga loose firearms nga gibana-banang moabot og usa ka milyon, kuyaw pa nga ang off-duty nga polis maoy mabiktima sa tulis ug makuhaan sa iyang cellphone.

***

Usa sa mga nahisubo sa pagkapatay ni Mangitngit mao si Arsobispo sa Sugbo Ricardo Cardinal Vidal.

Niawhag si Cardinal Vidal nga tan-awon og balik sa mga magbabalaod kining balaod nga nagproteher sa mga menor de edad gikan sa criminal liability  – sa laktod di makiha kadtong nakahimog krimen nga nagpanuigon og 15 anyos paubos.

Nanghinaot ang talahurong cardinal nga makaamgo ang mga magbabalaod nga ang maong balaod giabusohan.