BISAN ang simbahang Katuliko way nakitang sayop kon di man iuli sa menor-de-edad ang dolyares nga iyang nakit-an sa basurahan.

Nasayran nga usa ka 16-anyos nga mamasurahay ang nakakuykoy og US$60,000 gikan sa Inayawan Sanitary Landfill sa miaging semana apan mga US$20,500 na lang ang nauli ngadto sa tag-iya.

Matod ni Msgr. Esteban Binghay nga makonsiderar nang iya sa batan-on ang salapi kay iya man kining nakit-an sa basurahan.

“Kon moingon kag basura, trash na. Sa ato pa wa nay gamit,” nagkanayon si Binghay.

Apan alang kaniya ang pagkalabay sa salapi aksidente lang ug wa gyuy intensyon nga ilabay kini.

“Way tawong in his right sense molabay anang kantidara,” matod ni Binghay.

Kon duna nay nangitang tag-iya sa salapi, matod ni Binghay, nga angayan lang usab kining iuli kay kinahanglang mopatigbabaw ang pagkamatinud-anon sa tawo.

Apan dugang ni Binghay nga di kini basta-basta lang usab nga iuli kay kinahanglang siguruon ang giulian mao ba gyud ang tinud-anay nga tag-iya.

Sa iyang bahin, si Msgr. Achilles Dakay, tigpamaba sa Archdiocese of Cebu niingon nga wa siyay nakitang sayop sa gihimo sa batan-on kay makonsiderar lang siya nga “finder’s keeper.”

Apan kon nasayod kang dunay tag-iya sa butang ug kini gipangita na, di kini sala apan usa ka dakong sayop kay imo kining gihikawan sa iyang butang, matod ni Dakay.

“Every sin is evil but not every evil is sin,” nagkanayon si Dakay.

Si Binghay niingon nga makonsiderar lang nga sala ang gihimo sa bata kon nagpakahilom lang siya ug wa mosulti sa iyang nakit-an.

Kon iya mang nagasto ang salapi nga di iya, matod ni Binghay nga di kini sala kay “in good faith” kini niyang gigasto sanglit wa pa man siya masayod sa tag-iya.

Nipasidaan lang si Binghay nga kon dunay makit-ang butang, kinahanglang subayon gyud og una kon duna bay nanag-iya niini.

“Mahimo na nimong ipasibya pero delikado kon daghan na sang moangkon,” nagkanayon si Binghay.

Kon way moangkon sa butang, matod ni Binghay nga mao pa unya na nga higayon nga imo na kining angkunon o gamiton. (CPL)