SAMDAN sa iyang bukton ang usa ka batan-on nga kalit lang gipusil samtang nagbarogbarog daplin sa dalan sa Pardo, siyudad sa Sugbo, pasado alas 12:00 sa tungang gabii.

Nadangat sa tambalanan mao si Jason Dejos, 22, taga Back Central, sityo Tayud, Barangay Basak Pardo.

Sun.Star accepts donations for victims of Typhoon Ondoy

Sa taho sa GMA Cebu kagahapon, si Dejos nakabsan sa kinabuhi sud sa ospital.

Sa taho nga nasayran gikan kang Brgy. Kapitan Dave Tumulak sa Basak Pardo nagbutyag nga nagbarogbarog ang biktima daplin sa dalan, gikan nga nagpatimbang sa mga puthaw nga iyang napunitan, sa dihang nilabay ang usa ka motorsiklo nga gisakyan ug duha ka tawo.

Pag-abot sa unahan, mibalik ang motorsiklo ug ang back-rider maoy nipusil sa biktima maka-usa ka higayon.

Daling nakasibat palayo sa lugar ang mga suspek samtang ang biktima gidala sa iyang mga silingan sa tambalanan.

Dugang nasayran sa kapitan nga posibleng na-alaan ang biktima kay gidungog sa dapit nga dihay pipila ka mga gidudahang kawatan nagpuyo.

Sigon sa nasayran nga di sakop sa usa ka frat ang biktima sa ilang dapit.